Регионнуң одалга болгаш энергетика сайыды Эдуард Кууларның дыңнатканы болза, Мөңгүн-Тайга кожууннуң Мугур-Аксы суурда дериг-херекселдерни ажылдадыр мурнунда хынап дооскан. Катап тургузуушкун ажылдарын доозар мурнунда, суурга чырык каш катап өшкен – деп, ол тайылбырлаан.
Ноябрь 9-туң, суббота кежээзинден электростанция ажылдакчылары база Кызылдан келген специалистер – инженерлер биле «Дизель» КХН-ниң эдикчи специализи кирген ажылчын бригада суурнуң чырыын ажылдадыр дээш, дүн-хүн дивейн ажылдаан. Специалистер үрелиишкинниң чылдагаанын тып, элеп-эргилээн кабельди болгаш дериг-херекселди солаан.
Суурнуң шупту 13 подстанциязын чада аайы-биле кошкан соонда, электростанция долу күжү-биле ажылдап эгелээн. Специалистер коштунган чырык четкизин хынаарын доозуп, электростанцияның ажылын хайгаараан.
Тываның Баштыңы Владислав Ховалыг бо хүннерде Москвада ажыл-албан аайы-биле сургакчылаашкында-даа болза, Мөңгүн-Тайга кожуун төвүнде чырык хандырылгазында байдалды бодунуң контролюнга тудуп турган. Бо байдал республикада ук айтырыг кайы хире чидиг бооп турарын база бадыткаан деп ол айыткан.
"Кожуунче чырык-хандырылга шугумун чүгле туткаш, ынчан үзүктел чок чырык хандырылгазын чедип алыр бис. Төлевилелди дүрген ажылдап кылыр даалганы Одалга-энергетика яамызыга даастым – деп, Мугур-Аксынга байдалга хамаарыштыр бодунуң блогунда бижээн. – Амгы үеде агаар шугумунуң тудуунга санаашкыннарны кылып турар. Ону Барыын-Хемчик кожууннуң Эрги-Барлык суурдан шөйер чадавас. Хөй миллиард түңнүг төлевилелдиң акшаландырыышкын дөстерин тывар ажылды чергелештир чорудуп тур бис. Чаа ЛЭП-ти 4-5 чыл дургузунда тудуптар аргазын көөр бис".
Суурда чырык хандырылгазының өшкени-биле, Мөңгүн-Тайга кожуун чагыргазының социал адырының кожуунда комиссия кежигүннери чааскаан чурттап турар узун назылыг кижилерде база берге амыдыралдыг өг-бүлелерде байдалды хынаан. Онза байдалды өөренип көргеш, дузага хереглелдиг улусту деткиир хемчеглерни алган. Кожууннуң социал объектилерин чырык-биле хандырар кылдыр шимчеп чоруур станцияларны тургузуп, ында уругларны изиг чем-биле хандырган.