Улусчу чогаадылга бажыңынга республиканың өөредилге черлериниң улусчу ужур-чаңчылдар талазы-биле IX фестивалы болуп эрткен. Кызылчылар болгаш аалчылар аңгы-аңгы чоннарның национал хөгжүм болгаш танцы-самын сонуургап, хөй талалыг уран чүүлү-биле танышкан.
Фестивальды 2004 чылдан бээр Россияда демдеглеп турар Чоннуң чаңгыс деминиң хүнүнге тураскаадып эрттирген. Бүгү чуртта ышкаш, Тывада база аңгы-аңгы чоннар амыр-тайбың чурттап, бот-боттарының сагыш-сеткил сайзыралын байлакшыдып, культуразының хөй талалыын көргүзүп чоруур. Фестивальдың киржикчилери өңгүр чараш көргүзүглер дамчыштыр чоннарның чаңгыс демниг күчү-күжүн болгаш культураның янзы-бүрү байлаан бараалгаткан.
Тываның Аныяктар херектериниң талазы-биле сайыды Субудай Оюн фестивальды ажыдып тура, бедик деңнелдиг байырлалга белеткенгенин демдеглээн. Аныяктарның культурлуг солчулгазынга чугула шөл апаар Чоннар аразының найырал клувун ажыдырынче кичээнгейни угландырган.
Фестиваль үезинде ужур-чаңчылдарны камгалап арттырарынче угланган ындыг бир клуб ажыттынган. Төлевилел аныяктарның аразында делегей чергелиг кады ажылдажылганың хөгжүлдезинге идигни бээр.
Ортумак тускай өөредилге черлериниң 100 ажыг сургуулдардан тургустунган 11 команда фестивальга киришкен. Тываның Аныяктар херектериниң талазы-биле яамы хемчегни организастаан болза, республиканың Өөредилге, Культура яамылары, Националдар херектериниң талазы-биле агентилел база Кызыл хоорай мэриязы партнерлары болган.