Чырык талазы-биле специалистер болгаш «Дизель» КХН наладчиги Мөңгүн-Тайга кожууннуң Мугур-Аксы суурда электростанцияның чырык четкилеринде токтуң өжүп-кыпкан болуушкунун шинчилеп база чайладыр дээш ажылдап турар. Чырыктың өже бээриниң мурнунда ол хереглекчилерге анаа чедип турган.
Дизелдьдиг электростанцияның специалистери ноябрьның 9-та Мугур-Аксының чырык четкизинге өжүп-кыпкан таварылга дериг-херекселдерниң эртир изээш үрелиринге чедирип болурун көргеш, чырыкты бээрин кызыгаарлаар шиитпирни хүлээп алган. Одалга болгаш энергетика сайыды Эдуард Куулар, бо удаада шын шиитпир хүлээп алдынганын, оон-даа аар салдарлардан чайлай бергенин демдеглээн.
Электри четкилеринге аварийлиг байдалды тургуспазы-биле, ноябрьның 10-да Мугур-Аксынга чырыкты таарыштыр өжүрер графикти ажыглаан: суурнуң чамдык кудумчуларын болгаш объектилерин чырык-биле хандырган 13 подстанцияны элээн каш шак дургузунда ээлчештир өжүрген. Специалистер подстанцияларны өжүрүп тургаш, чырык четкизинде үрелиишкинерниң чылдагааннарын тып турар.
Чырык шугумнарын, дизельдиг генераторларны база чырык дериг-херекселиниң деңге ажылдаарын башкарар контроллерлерни хынаан. Дизельгенераторлар болгаш өске-даа дериг-херекселдер ажылдап турар. Мугур-Аксы суурда бирээзи-ле 500 кВт күчүлүг дөрт – ийи кол база ийи курлавыр дизельгенераторлар бар. Бо хүннерде трансформаторну, ооң камгалал системазын база кабель шугумнарын хынаан.
Мугур-Аксы суурда чырык энергиязының хереглекчилерин хандырары-биле "КамАЗ" автомашина баазазында бирээзи-ле 315 кВт күчүлүг ийи мобильдиг генератор чеде берген, чырык четкизинде коштунган, курлавырда контейнер хевирлиг 100 кВт күчүлүг генератор, ажыглалдан үнүп болур удазынны солуур СИП-кабель бар.
Бо шакта кожуунда чырык хандырылгазында байдал чогумчалыг. Яамының тайылбырлап турары болза, чырык шугумнарын, ону бээр дөстер системазын хынаар база хереглекчилерниң эт-хөреңгизи үрелирин болдурбас дээш, түр када чырык бээрин кызыгаарлаан. Ол үеде суурнуң социал объектилери - Мөңгүн-Тайганың төп кожуун эмнелгези, ийи школа, алды уруглар садтары ажылын уламчылавышаан, уруглар садтарында чаштарны изиг чем-биле, школачыларны дүрген чиптер чемнер-биле хандырган. Республиканың Одалга болгаш энергетика яамызының баш бурунгаар медээзи-биле алырга, дериг-херекселдерни хынааш, ооң ажылдаарын эдипкен соонда, электростанция штаттыг чурум-биле чырыкты катап берип эгелээр.