Тываның эрге-чагыргазы хөй ажы-төлдүг өг-бүлелерге музейлерже халас кирер арганы берген. Ноябрь 6-да болган хуралда, республиканың эрге-чагыргазы 96 муң өг-бүлениң 40 ажыг хуузунга, азы хөй ажы-төлдүг деп эрге-байдалдыг 38,7 муң өг-бүлеге ындыг эргени бээриниң чурумун бадылаан.
РФ-тиң Президентизиниң хөй ажы-төлдүг өг-бүлелерге социал деткимче хемчеглериниң дугайында чарлыын боттандырар сорулга-биле чиигелдени тургусканын ТР-ниң Күш-ажыл яамызы тайылбырлаан. Оларның санында күрүне эрге-чагыргазының регионалдыг органнарының башкарылгазында азы оларның организастааны делгелгелерже база музейлер, культура болгаш дыштанылга парктарынче халас кирер хемчеглер бар.
Документ чүгле эрге-чагырга органнарының эрттирип турары культура-массалыг хемчеглеринче чиигелде көрдүнгенин тодараткан. А экскурсия эрттирикчизиниң ачы-дузазы ынаар кирбес – бир эвес гидтиң дузазын алыксаар болза, боду төлээр апаар. База ол ышкаш күрүне албан чериниң шөлүнде өске улустуң организастааны коммерциялыг хемчеглерже чиигелделер чок болур.
Хөй ажы-төлдүг өг-бүлениң кежигүнү чиигелдени ажыглап, халас кирер билетти алыр дизе, эрге-байдалын бадыткаан шынзылгазын азы Күрүне ачы-дузаларның чаңгыс аай порталы таварыштыр ындыг эрге-байдалының барын бадыткаан телефонунда QR-кодун албан чериниң кассазынга көргүзери албан. Оон аңгыда бодун бадыткаан документ – паспортун, назы четпээн болза, төрүттүнгениниң дугайында херечилелин, азы студент биледин көргүзер.
Неделя бурунгаар, республиканың Чазаа хөй ажы-төлдүг өг-бүле эрге-байдалының дугайында шынзылганы алырын бөдүүнчүдер шиитпирни хүлээп алганын сагындыраал. Ам хамаатылар өг-бүле составының дугайында дээш өске-даа документилерни социал камгалал органнарынче боттары эккеп турбас. Күрүне ачы-дузаларының порталында доктааткан майыкка электроннуг билдириишкинни долдуруптарга, артканын албан чериниң ажылдакчылары боттары кылыптар.