Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев Сибирь федералдыг округда арага болгаш таакпы рыногун контрольдаар регионнар аразының эргелелиниң удуртукчузу Светлана Романова-биле ажыл-агыйжы ужуражылганы эрттирген.
Арага болгаш таакпы продукциязын бүдүрер болгаш садып-саарар адырда күрүнениң экономиктиг сонуургалдарын камгалап, хамаатыларның кадыкшылын камнаар болгаш айыттынган продукциядның айыыл чок чоруун хандырар хемчеглерни сайгарып көрген. Арага рыногунуң турум чоруун хандырар, албан күүседир негелделер хажыдыышкыннарын болдурбас, арага болгаш таакпы продукциязын чажыт садып-саарарын эвээжедир хемчеглерни тодаргай чугаалашкан.
«Чоннуң кадыкшылын камнаары – Россияның Президентизи Владимир Путинниң онза кичээнгей угландырган күрүнениң мурнады боттандырар айтырыы. Бистиң чуртувуста амыдыралдың кадык овур-хевиринче доктаамал ындыг ажылды угландырганындан – хамаатылар күш-культура болгаш спорт-биле холбажып, хоралыг чаңчылдардан ойталаары нептереңгей апарган. Бо угланыышкыннарны кады күжениишкиннер-биле быжыглаары кончуг чугула» - деп, бүрүн эргелиг төлээ демдеглээн.
Чыл эгезинден бээр СФО-да эргелел пландан өскеде база, шупту 18 контроль хыналдаларны чоруткан, административтиг чурум үрээшкиннериниң дугайында 33 херекти оттурган, 140 муң ажыг литр чажыт арага продукциязын хавырган. Эрге-хоойлу камгалаар органнар-биле кады ажылдааш, хоойлуга чөрүштүр садыглаашкындан 600 муң хире литр чажыт арага продукциязын уштаан.
«Честный знак» деп тодаргай демдээ чок, ону бүдүргенин болгаш саарылгаже кииргенин шынзыткан документилери коштунмаан болгаш АГАИС-те бүрүткээн информациязы чок чажыт продукцияда пиво болгаш пиво суксуннары колдап турарын Романова демдеглээн. Чүгле 10 ай иштинде «Росспиртпром» АН 1,2 миллиона литр ажыг чажыт араганы шыгжаг база узуткаашкынче чүдүрген.
2024 чылдың эгезинден бээр эрге-хоойлу камгалаар органнар-биле кады 88,6 муң хап таакпы продукциязын, 3,1 муң хап никотин холумактыг продукцияны хоойлуга удур саарылгадан хавырган. 19 муң ажыг килограмм меге таакпы болгаш никотинниг продукцияны узаткаар кылдыр улаштыр дамчыткан.
Анатолий Серышев арага болгаш таакпы рыногунда хоойлужудулга айтырыын шиитпирлээринге ведомстволарның аразында кады ажылдажылганың чугулазын демдеглээн. Росалкогольтабакконтроль эргелелиниң, эрге-хоойлу камгалаар болгаш контроль-хайгаарал органнарының демниг кады ажылдажылгазы хыналдаларның шынарын бедидип, негелделерге дүүшкен шынарлыг барааннарның садыг-саарылгаже кирерин хандырып, контрольда акцизтиг продукцияны чажыт сатканындан бюджетке хора чедирерин эвээжедир.