Тываның Баштыңы Владислав Ховалыг Кызылдың мурнуу-чөөн талазында инженерлиг инфраструктура объектизи – соок суг хандырылгазының сордурулга станциязының болгаш алды километр узун хоорза шугумунуң ажыдыышкынынга киржип, «Чурттаар оран-сава болгаш хоорай хүрээлеңи» президентиниң национал төлевилелиниң күүселдези-биле ажыттынган чаа коммуналдыг объектиниң ажылынга үнелелди берген:
«Бистиң хоорайывыстың хөгжүлдезинге, чаа микрорайоннар тудуунга база ол бажыңнарның суг хандырылгазының бүзүрелдиг чоруун бедидеринге чаа инфраструктура улуг салдарлыг. Объектини Тиилелгениң 75 чылы кудумчуну ояр чер чанынга тудуп, ону оон-даа улгаттырарын планнаан. Чуртталга бажыңнарын тударда, тудуг шөлдерни баш бурунгаар хевирлеп алыры чугула. Чаа коммунал белдирниң ында туттунганы ол чоок-кавын дүрген сайзырадыр база тудугжуларга чаа шөлдерни тускайлаар аргалыг апаар. Бо чугула төлевилелдиң күүседикчизи «Бастион» компанияга төлевилелди чедиишкинниг боттандырганы дээш, өөрүп четтирдим» - деп, Тываның Баштыңы үнүүшкүн соонда бодунуң блогунда бижээн.
Төлевилел бир чыл иштинде күүсеттинген. «Чурттаар оран-сава болгаш хоорай хүрээлеңи» деп президент национал төлевилелиниң бир кезээ болур «Арыг суг» федералдыг программадан ажылдарны акшаландырган. Хоорза шугумунуң өртек-үнези 233 млн. рубль болган. Насос станциязының бодунче 69 млн. рубль үнген. Ол хүнде-ле 14 муң кубометр сугну хандырар күчүлүг.
Россияның тудуг болгаш чуртталга-коммунал ажыл-агыйы Ирек Файзуллин-биле Тываның Баштыңы Владислав Ховалыг ужурашканының соонда, 2023-2025 чылдарда боттандырар «Арыг суг» федералдыг төлевилелче Тываның Кызыл хоорайда туттунуп турар «Иркутский» микрорайонунда суг хандырылгазын күштелдирер насос станциязының тудуун киирерин чедип алган болгаш республикага ол төлевилелди боттандырар планнары-биле үлешкен. Республикада “Арыг суг” деп федералдыг программаның деткимчези-биле республикада Кызыл хоорайда туттунуп турар Иркутский микрорайонга суг хандырылгазының насос станциязын тудары, Ак-Довурак хоорайга суг чыыр черни эде чаартыры, ол ышкаш Каа-Хем суурга «Преображенский» чуртталга комплекизин хандырар суг станциязын тудары планнаттынганын сагындыраал.