Арат шөлүнге, республиканың национал культураларының хөй янзызын көргүскен артистерниң болгаш бөлүктерниң киржилгези-биле, Чоннуң чаңгыс деминиң хүнүн улуг байырлыг концерт-биле демдеглээн. Тываның Баштыңының Администрация болгаш Чазак Аппарадының удуртукчузу Юрий Ананьин чаңгыс чер чурттугларынга байырны чедирген.
«Тываларның патриотчу хей-аъды республиканың хөгжүлдезинге кол шимчедикчи күш болуп, бистиң чуртувус чоргаарланып чорууру националдар болгаш шажыннар аразының тургузуунга улуг рольду ойнап турар» - деп Юрий Анаьин чугаалаан.
Республикада 100 ажыг нациялар төлээлери чурттап турар, ол чүүл республиканы онзагай болгаш хөй националдыг болдурганын ол демдеглээн. Тускай шериг операциязында бистиң чаңгыс чер чурттугларывыстың киржилгезин эрес-дидим болгаш бердинген чоруктуң чижектери кылдыр айыткан.
– Чоннуң чаңгыс деминиң хүнүнде дайынчыларга, фронтуга болгаш чаа регионнарга дузазын көргүскен республиканың шупту чурттакчыларынга өөрүп четтирдивис. Республика Ада-чурт камгалакчыларының дайынчы маадырлыг чоруктарынга база чаңгыс чер чурттугларының Төрээн чуртун камгалап тургаш, коруш чок болгаш тура-соруктуг ажыл-херээнге чоргаарланып чоруур деп, ол онзалап демдеглээн.
Россияның Маадыры, гвардияның бичии сержантызы, 55-ки гвардейжи мотоадыгжы даг бригадазының разведка батальонунуң шавар халдаашкын бөлүүнүң командири Буян Куулар база ооң-биле чөпшээрешкен. Тускай шериг операциязы бистиң чурттуң регионнарындан аңгы-аңгы культуралыг, дылдарлыг болгаш езу-чаңчылдарлыг шупту дайынчыларны каттыштырганын деп, ол байыр чедириишкининде чугаалаан.
Чазак Даргазының оралакчызы Айдын Чюдюк он бир аныяк хамаатыларга паспорттарны байырлыг байдалда тывыскаш, Россия Федерациязының хамаатыларының эрге-байдалынга дүүштүр сөс-биле-даа, ажыл-херээ-биле-даа дүгжүп, хүндүткелдиг болгаш хоойлу-дүрүмнү сагып чоруурун күзээн.
Арат шөлүнге национал чоннарның делгелгезин чаңчыл езугаар организастап, оларның аъш-чемин делгеп, улусчу идик-хевин, продукциязын көргүскен. Хөй-ниити организациялары, күүсекчи эрге-чагырга органнары боттарның ажылы-биле таныштырып, консультацияларны берген. Республиканың чогаадыкчы бөлүктери база чыылганнарның хей-аъдын көдүрген. Республиканың аңгы-аңгы нацияларның ат-сураглыг болгаш аныяк артистер, орус ырыларның «Раздолье» улусчу ансамбли, «Тыва» аас чогаал ансамбли, «Жар птица» ыры ансамбли дээш, оон-даа өскелер оюн-көргүзүүн бараалгаткан.