Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев байыр чедириишкининде Чоннуң чаңгыс деминиң хүнүнүң төөгүлүг болгаш сүлде-сүзүктүг ужур-утказы онза бедик дээрзин демдеглээн. Бо байырлал чонувустуң тиилеттинмес хей-аъдының күжүн, Ада-чуртунга ёзулуг бердингенин болгаш ону кандыг-даа өртек-биле камгалаарынга беленин көргүзүп турар.
Байырлал 1612 чылда Москваны Польшаның халдаашкынындан хостаар дээш чоннуң ополчен шериин тургускан болуушкуннар-биле холбаалыг. Ооң кежигүннериниң аразында аңгы-аңгы аңгыларның, шажыннарның болгаш чоннарның төлээлери турган.
«Патриотчу сеткил, чоннарның культураларынга болгаш чаңчылдарынга ханы хүндүткел, эп-сеткил, бот-боттарынга дуза болгаш чогаадыкчы ажылдажылга – Россияның национал культуразының чугула үндезиннери. Бистиң чуртувустуң төөгүзүнде аңгы-аңгы чоннарның болгаш шажын-чүдүлгениң төлээлери орус күрүнениң чаңгыс демин эгин кожа камгалап чораан таварылгалар хөй. Бөгүн чаңгыс улуг өг-бүле болуп, Россияның бот-догуннаашкынын база катап быжыглап, ооң аас-кежиктиг келир үезин хевирлеп турар бис» - деп, Анатолий Серышев чугаалаан.
Чоннуң чаңгыс дем хүнүн чаңчыл ёзугаар демдеглеп тура, Сибирьниң регионнарында аңгы-аңгы чоннарның ёзу-чаңчылдарын болгаш ужурларын, Россия Федерациязының девискээринде чурттап чоруур чоннарның бот-тускайлаңын таныштырган калбак байырлыг хемчеглер эртип турар. Ол ышкаш бо чылын Россияның күрүнениң телерадиодамчыдылга компаниязы «Россия – улуг өг-бүле» деп 16 шактың марафонун эрттирип, бистиң чуртувуста регионнарның өг-бүле ужур-чаңчылдарның дугайында онлайн дамчыдылгага көргүскен.