Бөгүн В. Көк-оол аттыг национал театрга, «Тыва дыл – чоннуң өнчүзү» деп шуулган үезинде, Тываның Баштыңы Владислав Ховалыг Национал чогаал шаңналының тиилекчилерин байырлыы-биле чарлап, оларга акша сертификаттарын тывыскан. Уран-чечен очулганы сайзырадып, тыва чогаалдың ужур-чаңчылдарын кадагалап арттырар болгаш ону нептередир сорулга-биле, 2019 чылдан бээр ук шаңналды чылдың-на тыпсып турар.
Бо чылын мөөрей комиссиязы шаңналдың чаңгыс хемчээлин доктааткан. Шылгараан авторлар 60 муң рубль түңнүг акша шаңналдары-биле шаңнаткан. Мөөрейже ниитизи-биле 13 төлевилел кирген, оларның бежи шилилгени эрткен.
Тыва дыл хүнүнге тураскааткан байырлалда дараазында авторларны Национал чогаал шаңналының лауреаттары кылдыр чарлаан:
Мижит-Доржу Любовь Кара-ооловнаның «Хоругдал» деп чогаалы «Россияның болгаш Тыва Республиканың чоннарының мөзү-бүдүжүн болгаш хей-адын кадагалап артырарынга болгаш сайзырадырынга үлүг-хуузу дээш» деп номинацияга тиилээн.
Принцев Игорь Владимирович Б-Б. Тараачының «Кайгал» деп чогаалын орус дылче очулдургаш, «Уран-чечен очулганы сайзырадып, тыва чогаалдың ужур-чаңчылдарын кадагалап арттырар болгаш ону нептередиринге үлүг-хуузу дээш» номинацияга шылгараан.
Ооржак Лидия Хорагаевна «Чүрек согуу деңге соп чор» деп уран-чечен чогаалы-биле «Тускай шериг операциязының маадырларының дугайында төөгүлүг сактыышкыннарны арттырарынга үлүг-хуузу дээш» шаңналга төлептиг болган.
Ховалыг Маадыр Бартыштаанович «Гиннес рекордунче киргеним» деп ному-биле «Өзүп олурар салгалды патриотчу болгаш интернационалчы сеткил-хөөнге кижизидер херекке үлүг-хуузу дээш» деп шаңналды алган.
Серен-Чимит Зинаида Салчаковна уругларга «Ойнаарактарның хомудалы» деп шүлүктер болгаш ырыларлыг чогаалдары-биле «Уруглар чогаалын хөгжүдеринге үлүг-хуузу дээш» деп номинацияга тиилээн.