Тываның Чазаанга, республика Баштыңы Владислав Ховалыгның удуртканы ээлчеглиг хуралга элээн каш нормативтиг эрге-хоойлу актыларын сайгарып көрген.
2025 чылда база планныг 2026 база 2027 чылдарда республиканың социал-экономиктиг прогнозунуң дугайында хоойлу төлевилелин сайгарылгаже киирген. Регионалдыг экономика яамызының кииргени баш бурунгаар санаашкында кол көргүзүглерни – демографтыг хөгжүлде, регионалдыг каттышкан продукт, үлетпүр бүдүрүлгези, көдээ ажыл-агый, тудуг, биче болгаш ортумак сайгарлыкчы чоруктуң хөгжүлдези, инвестициялар, күш-ажыл рыногу болгаш өске-даа угланыышкыннарны киирген.
Экономика сайыдының албан хүлээлгезин күүседип турар Снежана Ховалыг бодунуң илеткелинде 2023 чылдың түңнелдери-биле дыка хөй макрокөргүзүглерде – тудугда, садыглаашкында, транспортта, күш-ажыл рыногунда, амыдырал-чуртталга деңнелинде эки өзүлде барын демдеглээн. 2024 чылдың тос айларында база ындыг көргүзүглер демдеглеттинген. 2023 чылдың ол үезинге деңнээрге чуртталга бажыңнарын киирериниң хемчээли 2 катап, үүрмектеп садыглаашкын – 14 хуу, төлевирлиг ачы-дуза хемчээли – на 2,5 хуу көвүдээн болза, ажылчоктарның саны 2 муң кижиге кызырылган.
Бо чылдың түңнелдеринден алырга регионалдыг каттышкан продуктунуң хемчээли 123,6 млрд рубль болган, ооң мурнунда чылга деңнээрге 5 хуу азы 5,5 млрд рубль хөй. 2025 чылда ол 6 хуу улгадып, 130,9 млрд рубль чедер. 2026 чылдап улуг тывыш компанияларын ажылдадыры-биле элээн бурунгаар өзүлде болур ужурлуг. 2027 чылга чедир тудуг сектору, агроүлетпүр комплекизи, туризм болгаш садыг-саарылга турум хөгжүүр.
Регионалдыг Күш-ажыл яамызының киирген төлевилелдер бадылаттынган. Хөй ажы-төлдүг өг-бүлелерге социал детемче хемчегшлерин бээриниң чорудуун бөдүүнчүткен өскертилгени, «Тыва Республикада чурттакчы чонну ажылче хаара тударынга деткимче» күрүне программаже тускай сорулгалыг көргүзүглерни немей киирген. Ол ышкаш хоойлу төлвелелин хүлээп алырга Россия Федерациязының Президентизиниң «май» Чарлыктарынче кирген ажылдакчылардан аңгыда (башкы ажылдакчылар, культура ажылдакчылары, эмчилер, ортумак болгаш биче эмчи ажылдакчылары, эртем ажылдакчылары, социал ажылдакчылар), республиканың казна, бюджет болгаш автономнуг албан черлериниң ажылдакчыларының шалың төлевири улгадыр ужурлуг.
Хуралдың киржикчилери директорларның кижизидилге талазы-биле чөвүлекчилеринге ай санында акша шаңналын төлээриниң дугайында, чурттакчы чонга транспорт хандырылгазының регионалдыг комплекстиг планын белеткээриниң болгаш боттандырарының чурумун база регионалдыг күрүне контролюн организастаар болгаш боттандырарының чурумун чаңгыс үн-биле бадылаан.