Кызыл хоорайда черлик ыттан калчаа аарыы илереттинген. Халдавырның тарап нептерээрин болдуразы-биле, хоорай девискээринде карантинни чарлаан. Октябрь 30-де Тыва Республиканың Чазаа калчаа аарыының тывылган черин чок кылып, ооң тарап нептерээрин болдурбазы-биле кызыгаарлаттынган хемчеглерни (каратинни) чарлаар дугайында чогуур айтыышкынга атты салган.
Чазак даргазының оралакчызы Уран-оол Ондар регионалдыг Көдээ ажыл-агый яамызының, Ветеринария албанының, Росхереглелхайгааралының база мэрияның удуртукчулары киришкен хуралды дарый эрттирген. Хоорайда бирги ээлчегде чорудар ужурлуг комплекстиг хемчеглерни чорудуп турарын харыысалгалыг ведомстволар дыңнаткан. Кызыл хоорайда азырал амытаннарны калбаа-биле халас тарыыр. Мэрияның специалистери өрегелерни кезип, медээни дыңнадып тарадыр.
Октябрьның 27-де, төп черде калчаа аараан ышкаш ыт чоруп турарын бир хамааты хоорай мэриязының ЧДДА-же дыңнаткан. Ыттар тудар албан ол черже дораан үнгеш, ээлери чок ийи ытты туткаш, шинчилээр кылдыр лабораторияже дамчыткан. Туткан ийи ыттың бирээзинде эмнеттинмес аарыгның халдавыры барын лабораторлуг шинчилелдер октябрь 28-те бадыткаан. Аарыг ыттың баштай чораан чери – Кочетово кудумчузунда административтиг оран-сава – Дом быта чаны аарыгның өөскээн чери кылдыр санаттынар.
Карантин үезинде, калчаа аарыынга удур тарыткан дириг амытаннардан аңгыда, аарып болгу дег дириг амытаннарны 179 хонук дургузунда киир болгаш үндүр сөөртүрү хоруглуг. База ол кезекке, 3 километр радиуска, мал-маганга хамаарылгалыг ярмаркалар, делгелгелер дээш, өске-даа хемчеглер эрттирерин соксадыр. Ынчангаш хоорай девискээринге дыштаныр хүннүң ярмаркаларын 2 ай иштинде эрттирбес.