Ренат Ооржак Москвада Россияның Улустарның найыралы университеттиң 2003 чылда, Тываның күрүне университединиң 2018 чылда доозукчузу. 2022 чылда Тываның өөредилге сайзырадыр болгаш мергежил бедидер институдунга «Ниити өөредилге чериниң башкызы (эртем), «математика башкызы» талазы-биле профессионал эде белеткелди эрткен. Ол ышкаш Россия Федерациязының Президентизиниң чанында Россияның улус ажыл-агый база күрүне албанының академиязын дооскан.
Ренат Чадамбаевич Россия Федерациязының Экономиктиг сайзырал болгаш садыг яамызынга аңгы-аңгы албан-дужаалдарга болгаш Москва хоорайда Тыва Республиканың бүрүн эргелиг төлээзинге ажылдаан. Республиканың күрүне албанынга эрге-дужаалдарны ээлеп турган. 2015 чылда Тыва Республиканың Баштыңының Администрациязынга база Тыва Республиканың Чазааның Аппарадынга ажылдап турда, 2016 чылда республиканың экономика сайыдының оралакчызынга томуйлаан, ол Тыва Республиканың Баштыңының чөвүлекчизи чораан.
Тываның сайгарлыкчыларның эргелерин камгалаар бизнес-омбудсмен бооп 2020 чылдан бээр ажылдап чоруур.
Ренат Ооржак хөй-ниити ажылының идепкейжизи. Тыва Республиканың шахмат федерациязының удуртукчузу. Ооң удуртулгазы-биле сөөлгү чылдарда республикада чаа беш шахмат клубтары ажыттынган: «Гроссмейстер», «Гамбит», «Этюд», «Белая ладья», Шуй суурда шыдыраа клуву. Шыдыраага дүрген ойнаарының делегей чемпиону Сергей Карякинни Тываже келирин организастаан. Ренат Ооржактың инициативазы-биле Президент грантыларының фондузундан ийи шыдыраа клувун септээш, дерээн, «Хоочуннарывыска онлайн-шахматтар» деп төлевилелди ажылдаткан.