Республикада социал объектилер капитал септелгези адакталып турар. Ындыг болзажок кидин-түлүк ажылдап турар черлер база бар. Тываның Баштыңы Владислав Ховалыг күүсекчи эрге-чагырга органнарының база кожуун чагыргаларының даргаларынга объектилерде ажылдап турар тудуг организацияларын хүннүң-не хынаарын хүлээндирген.
Регион удуртукчузунуң медээзинден алырга, кадык камгалал объектилери колдуунда белен. Мөңгүн-Тайганың Төп кожуун эмнлегези шуут белен, Каа-Хем суурда поликлиникада, Тес-Хем кожуунда Хөл-Өөжү суурда ФАП-та ажылдар 75 хуу четкен. Офтальмология, эндокринология база оториноларингология салбырларының база «Тыва Республиканың кадык камгалал албан черлериниң админстративтиг-ажыл-агый хандырылгазының талазы-биле албан чериниң» административтиг оран-савазының чылыг дамчыдар даштыкы объектилерин тудуп турар. Оларның амдыызында белени 65 хуу, объектилерни бо чылдың декабрь 31-де дужаар.
Ийи культура албан черлеринде капитал септелгелер доозулгалак. Самагалтайда база Сарыг-Септе уругларның уран чүүл школаларын эде тудуп турар болза, Мөңгүн-Тайганың шии театрында ажылдар ам-даа чоруп турар.
Найысылалда эң улуг тудуг объектилериниң бирээзи – 4 дугаар школада ажылдар 90 хуу кылдынган. Тудуг бригадалары төнчү ажылдарже кирген, девискээрни чаагайжыдып, брусчатканы чадып турар. Оон өске өөредилге чери – Тываның Тудуг техникумунуң баазазында мурнады белеткээр төпте септелге ажылдары 76 хуу күүсеттинген.
Тываның Баштыңы Владислав Ховалыг күүсекчи эрге-чагырганың чогуур федералдыг органнары-биле электроннуг бюджеттиң шупту саң-хөө дугуржулгаларын чыл төнчүзүнге чедир чарарын яамылар болгаш чагыргалар даргаларынга сагындырган.