«Элита» КХН тудуг организациязы “Өөредилге” национал төлевилел боттандырылгазы-биле чаа өөредилге черлерин тудуп турар. Тудуглар 60 хуу беленин үнүүшкүннүг хыналда көргүскен. Объектилерде 115 тудугжулар, 22 санныг тускай техника хаара туттунган. «А» блокта даштыкы шывыг, кирер черлер декпелерин кылыры, шеверлел ажылдары, интернет, видеохайгаарал, өрт база камгалал медээчилериниң четкилерин эптеп шөйер ажылдар чоруп турар. Ооң-биле чергелештир девискээрлер чаагайжыдылгазын дүргедеткен. Тудугжулар херимнер эптээрин база кижи кылаштаар черлер чадарынче кирген.
Владислав Ховалыг тудуг организацияларның төлээлери база тудугжулар-биле ол-ла черлеринге ужуражып чугаалашкан. Регионнуң удуртукчузу тудуг объектилери ооң хууда контролюнда турарын сагындырып, бир дугаарында, ажылдарны дүргедедир даалганы берген.
Дараазында четкен тудуг шөлү – 250 олуттуг Культура бажыңы болган. Көдээ девискээрлерниң комплекстиг хөгжүлдезиниң күрүне программазы-биле тудар оран-саваны «Спутник» микрорайонда Культура хөгжүлдезиниң төвү ышкаш тудуп үндүрер.
21 ажылчын база ийи санныг тускай техника тудугнуң таваан дооскан. График езугаар, 2024 чылдың төнчүзүнге чедир, тудугнуң кырын дуглап доозуптар ужурлуг.