«Тыва - эрес-дидим чоруктуң девискээри, Тыва - эрес-дидим оолдарның чурту-дур. Бөгүн мында назы-хары чеже-даа бичии болза, оларның маадырлыг чоруун федералдыг деңнелде үнелеп көрген оолдарның чыглып келгенинге өөрүп тур мен» - деп, оралакчы дарга Айдыс Сынаа демдеглээн.
Федерация Чөвүлелиниң «Эрес-дидим чоруун көргүскени дээш» деп тураскаалдыг медальдарны Кызыл-Мажалык суурнуң 1 дугаар школазының өөреникчилери Ян Ооржак биле Алдын-Херел Сааяга тывыскан. Оолдар далып-тьрттар аарыглыг улгады берген эр кижиге бирги эмчи дузазын көргүзүп, ооң амы-тынын алганнар. Алдын-Херелдиң авазы Чойганмаа Саая оглунуң болгаш ооң эжиниң шаңналдар алганынга канчаар-даа аажок чоргаарланып, бөгүн эң-не аас-кежиктиг хүн болганын чугаалаан.
Республиканың эмчи колледжизиниң бирги курсчузу Ринчен Сазанаков кем-херек үүлгедикчизинден херээжен кижини камгалаан. Сентябрь төнчүзүнде Кызылдың 4 дугаар школа чоогунга ол болуушкун болган. Элээди оол кем-херек үүлгедиишкинин болдурбаан. Ринченниң хамааты идепкейлиг чоруу дээш алганы бо үшкү шаңналы – федералдыг шаңнал.
Сенатор Дина Оюн чалыы маадырларга медальдарны тыпсып тура, оолдарның маадырлыг чоруу улуг хүндүткелге төлептиг деп демдеглээн.
«Үе чергелери аразында мындыг маадырлар бар дээрзин билип алыр кылдыр, школачыларның сагыш-човаачал болгаш маадырлыг чоруктарын кезээде чугаалап чоруур херек. Ындыг оолдар, уругларның эң-не кол кижизиг шынары - энерел сеткилдиг, сагыш човаачал болгаш дузааргаан барымдаалап, амыдыралында профессионал чедиишкинниг апаарынга дузалажыры чугула» – деп, сенатор Дина Оюн чугаалаан.
Оолдар шаңналдарын алган соонда, оларга көргүскен хүндүткел дээш өөрүп четтиргенин илереткеннер. Аныяк маадырлар берге байдалда корткан бе деп айтырыгларга харыылап тура, коргуп девидейн, чүгле дуза кадарын бодап турганын чугаалаанннар.