«Россияның тудуг болгаш ЧКА сайыды Ирек Файзуллин-биле Тывага чиигелделиг ипотека программазын узадырының арга-хевирлерин сайгарып чугаалаштывыс. Сентябрь 2-де Кызылга болуп эрткен Тываның социал-экономиктиг хөгжүлдезиниң дугайында хуралдың түңнелдери-биле чурттуң Президентизиниң даалгалар даңзызынче ол айтырыг киргенин демдеглейн» - деп, Тываның Баштыңы бижээн.
Бо регионалдыг онзагай ипотека 2023 чылдың сентябрьдан 2024 чылдың июньга чедир ажылдаанын сагындыраал. Ол үе дургузунда 2355 чээлини берген, доктааткан планның көргүзүү 8 хуу ажыр күүсеттинген.
Шагаан-Арыгның база Ак-Довурактың ЧЭТ база Кызылдың арыглаашкын тудуу – үш улуг чуртталга-коммунал ажыл-агый объектилерин тудары ужуражылганың айтырыынче кирген. Федералдыг төп республиканың инициативазын деткээн, ам Россияның тудуг болгаш ЧКА сайыдының ол талазы-биле оралакчызы Алексей Ересько-биле тодаргай ажылдарны чугаалажып турар.