Тывада 12 ажыг чыл иштинде шөйүп келген тудуг – Каа-Хем суурда спорт-культура төвү адакталып келген. Республиканың Баштыңы Владислав Ховалыг тудуг шөлүнге чорааш, ооң дугайында дыңнаткан. Бо удаада тудугну дужаар үезин соңгаарлатпазынга ол идегеп турар, чүге дизе тудугжулар иштики арыг ажылдарже база дериг-херекселдер эптээринче кирген.
Каа-Хемниң СКТ регионда тудуп турар объектилерниң эң “кырганы” дээрзин сагындыраал. Тудугну 2012 чылда-ла федералдыг болгаш республика бюджеттеринден кады акшалындырыышкын-биле тудуп, ону ийи чыл болганда ажыглалче дужаар турган. Республика инвестиция хүлээлгелеринде бодунуң кезээн күүседир акша-хөреңгизи чедишпээнинден, ажылдар ара турупкан.
Оон дараазында чылдарда аңгы-аңгы дөстерден, бичии-бичиилеп акша-хөреңгини тыптынып турганындан, ажылдар ында-хаая чоруп турган. «Демография» национал төлевилелче спорткомплексти киирерин чедип алгаш, ооң турум акшаландырыышкынын хандырган.
Комплекс 7 муң көрүкчү кире бээр олуттуг, хөй ажыглалдыг ийи каът ареналыг улуг тудуг. Ында тыва аныяктар ортузунда эң нептереңгей спортчу хевирлер – волейбол, баскетбол, мини-футбол, гандбол, хүреш дээш, өске-даа залдар бар.
Владислав Ховалыг спортчу-культура төвүн шын ажыглаар аргаларны амдыгааштан дилеп, саналдаар даалганы тускай угланыышкынныг ведомствога берген. Бир талазында эң хөй кижилерни спортче калбаа-биле хаара тудар чер болур ужурлуг, өскезинде – бо хире улуг оран-саваны ажаалда-ажыглалы аар болганда, хандырылгазынче акшаны ажылдап алыр апаар.
Республиканың Баштыңы 2024 чылда ажыглалче дужаар ужурлуг өске үш чугула объектилерге четкен – Каа-Хем суурда, Кызылдың «Спутник» микрорайонунда школа тудугларынга база капитал септелгеде 4 дугаар школага. Владислав Ховалыг сооктар дүшпээнде баштай даштыкы ажылдарны база девискээр чаагайжыдылгазын доозарын негээн.
Кызылдың 4 дугаар школазының капитал септелгези керээде айыттынганы хуусаа – октябрьның 30-ге чедир доозар ужурлуг, ындыг болзажок ажылдар дүрген чоруп турарын Тываның Баштыңы демдеглээн. «Суг болгаш чылыг хандырылгазының системаларын солаан. Школаның даштын тыртып, тепкезин экижиткен. Ол чаа эт-сеп, өөредилге дериг-херекселдери четчелеттинген амгы үениң чаа школазы апаар ужурлуг».