Тываның Баштыңы Владислав Ховалыг Чаа-Хөл кожуунче сургакчылап чорааш, тускай шериг опреациязының киржкичизи, тус черниң чурттакчызы Айдыс Самдарактың өг-бүлези-биле ужурашкан.
Россияның Маадырлары Мерген Донгак, Буян Куулар база Чалым Чулдум-оол дайынчы эжи-биле ужуражылгага база киришкен.
Владислав Ховалыг медээлер солчуп, чугалажып олура, июль төнчүзүнде чаа регионнарже чораанының дугайында дайынчыларга чугаалаан. Регионнуң Баштыңы Донбасска амгы үеде дайынчы хөделиишкиннер зоназында тыва шериглер-биле ужуражып, “Дузаламчы” фондузунуң акша-хөреңгизи-биле саткан техниканы болгаш тускай дериг-херекселдерни оларга дамчыдып бергенин сагындыраал.
«Тыва дайынчыларның хей-ады бедик, күштүг, боттарының командирлеринден макталдыг» - деп Владислав Ховалыг демдеглээн. Дайынчыларның боттарның күзелдерин өөренип, регионда күрүне деңнелинде берип турар күрүне деткиишкиннериниң хемчеглери ам-даа калбарарын ол дыңнаткан.
Самдарактар – Чаа-Хөлде кызымаккай өг-бүлелерниң бирээзи. Ада-ие кызын база ийи оглун кижизидип өстүрүп турар. Өг-бүлениң эр ээзи Айдыс Омакович ТШО үезинде Луганск Улус Республиканың девискээринге тускай даалгаларны күүседип турган. Фронтудан чанып келгеш, социал керээни чарып, дээвиир чараштап шывар ажылче кирген. Чаңгыс чер чурттуглары мастерниң ак-сеткилдиг ажылын мактап ханмас. Өг-бүлениң херээжен ээзи Шолбаана Хереловна - Чаа-Хөл кожууннуң Өг-бүлеге болгаш уругларга социал дуза төвүнде психолог башкы.
Тываның Баштыңы аныяк өг-бүлеге ажы-төлүн езулуг патриоттар кылдыр кижизидеринге чедиишкиннерни күзээш, Айдыс Самдарак дээрге аныяк-өскенге эки үлегер-чижек-тир деп социал четкилерде бодунуң блогунда демдеглээн.