Тываның найысылалынга делегейде ады-сураа алгаан «Хүн-Хүртү» бөлүктүң 30 чыл оюнга тураскааткан «Азия төвүнде хөөмей» деп V делегей чергелиг фестиваль бодунуң ажылын эгелээн.
Бөгүн Тываның Баштыңы Владислав Ховалыг хөгжүм аас-чогаалын кадагалап арттырарынга киирген үлүг-хуузу болгаш бедик чогаадыкчы чедиишкиннери дээш хөгжүмнүг бөлүктүң хөөмейжилерин шаңнаар деп шиитпирлээнин социал четкилерде дыңнаткан. Бөлүктүң уран чүүл удуртукчузу Саян Бапага “Тыва Республиканың Улустуң Хөөмейжизи” хүндүлүг атты, хөөмейжилер Кайгал-оол Ховалыг биле Алексей Сарыгларга “Тыва Республиканың мурнунга ачы-дузазы дээш” дээш медальдарны тывыскан.
Владислав Ховалыг тыва хөөмейни сайзырадып, нептередиринге «Хүн-Хүртү» бөлүүнүң улуг үлүг-хуузун онзалап демдеглээн: «Салым-чаяанныг хөгжүмчүлер улуг салгалдың хөөмейжилериниң ажыл-ижин уламчылап, тыва хөөмейни делегейниң бедик профессионал деңнелинче үндүрүп, тургузуп, тыва чоннуң хөгжүмүнде кызыгаар чок дээрзин бадыткаан".
Бо чылын «Азия төвүнде хөөмей» фестиваль «Чогаадыкчы кижилер» федералдыг төлевилел езугаар Орус культура фондузунуң деткимчези-биле эртип турар. Фестиваль программазының кол хемчээ - Алдын-Булак этнокультура комплекизиниң девискээринде Хөөмейжининиң оваазын ыдыктаар ёзулал-биле эгелээн. «Бо ёзулал – фестивальдың аалчыларын болгаш чонну каттыштырган бистиң культурлуг ужур-чаңчылывыстың сүлде-сүзүктүг болгаш өгбелерге мөгейген чугула кезээ-дир» - деп, организакчылар тайылбырлаан.
Фестивальдың мөөрейлиг кезээнде “Хөөмей амгы үениң агымында” номинацияга боттарының күүселделерин таныштырган. Фестивальдың байырлыг ажыдыышкыны «Азия төвү» скульптура комплекизиниң шөлүнге 20-00 шакта болган. Оон Тыва культура төвүнге «Хүн-Хүртү» бөлүктүң хөгжүмчүлери мастер-класстарны эрттирип, «Чаңчылчаан ансамбль» номинацияда мөөрей кезээ аңаа уламчылаан. 19-00 шакта Арата шөлүнге эгелээн тиилекчилерни шаңнаар болгаш этнодискотека-биле фестиваль доозулган.