Тываның Баштыңы Владислав Ховалыгның даалгазы-биле тургустунган ис чок читкен ТШО киржикчилерин дилеп-тыварынга дуза көргүзер Чаңгыс аай дүүштүрүлге төвү ам республика Чазааның составында албан кылдыр ажылын эгелээн. Чоок кижизин дилеп-тыварынга боду арга-дуржулгалыг Мира Балчый регион Баштыңының дузалакчызы кылдыр албанны удуртуп турар.
Читкен өөнүң ээзин боду дилээр дээш моондактарга таварышкан херээжен, шак-ла ындыг байдалдыг чаңгыс чер чурттугларынга хоойлу-дүрүм болгаш тайылбырлыг дуза кадары-биле, коммерцияга хамаарышпас организацияны тургускан. Регионнуң Баштыңы организацияның ажыл-чорудулгазының ажыктыын көрүп, ол саналды деткээн.
Бо чылдың майда Тываның Баштыңы Владислав Ховалыг ис чок читкен дайынчыларның төрелдеринге деткимче көргүзер чаңгыс аай дүүштүрүлге төвүн тургузар дугайында шиитпирни хүлээп алган. Республика Баштыңы шериг албанныгларның төрээн болгаш чоок улузу-биле ужуражып тура, ындыг албанны тургузарын чарлаптарга, чыылган чон шиитпир үезинде хүлээп алдынганын демдеглеп, деткээн.
- Чаңгыс аай дүүштүрүлге төвүнче янзы-бүрү айтырыгларлыг кээп турар чон хөй. Специалистер тускай шериг операциязының киржикчилериниң өг-бүлезинге дузалажыр дээш, шупту арга-хевирлерни ажыглап турар. «Ада-чурт камгалакчылары» күрүне фондузу-биле сырый ажылдажылга тургустунган. Ниити ажылывысты ам-даа сайзыраңгайжыдар бис – деп, Владислав Ховалыг төптүң ажылын дыңнаткан.
Дөрт чаа регионда: Луганск, Донецк Улус республикаларда, Запорожье база Херсон областарда албанның төлээлери ажылдап турарын баштың дыңнаткан. Олар читкен дайынчыларның документ-саавырлары-биле ажылдап, албан эрттирип турган шериг кезектериниң командылалы-биле харылзажып, организастыг ажылдарны чорудуп, тус черниң эрге-чагырга черлери болгаш волонтер организациялары-биле ажылдап турар.
- Бистиң кол ажылывыс – шериг кижини дилээриниң шын чурумун тайылбырлап, ол талазы-биле ажылдыг органнарже документилерни бижииринге дузалажыр. Читкен кижизин танып тывар ажылды дүргедедир дээш, чогуур ведомствоже херек документилерни долдуржуп турар бис. Бир эвес херек апарза, билдириишкин киирикчизин улаштыр үдээр. Чижээ, психологтуң дузазын сүмелээр. «Ада-чурт камгалакчызы» күрүне фондузунуң регионалдыг салбырында психологче чорудуп турар бис. Биске айтырыглыг келген тускай операция киржикчилериниң өг-бүлезинге дузалажырын кызыдар бис. Кижилер боттарының айтырыы-биле артып калбазын дээш, деткимчени көргүзер – деп, төптүң удуртукчузу Мира Балчый чугаалаан.
Чаңгыс аай дүүштүрүлге төвүнүң төлээлери үстүнде ачы-дузалардан аңгыда, читкен кижизиниң мөчүзүн танып алыр кылдыр Донда-Ростов хоорайда шеригниң клиниктиг госпиталынче билдириишкин бижииринге дузалажып турарын Балчый тайылбырлаан.
Чаңгыс аай дүүштүрүлге төвүнүң (албанны) офизи дараазында адресте: Кызыл хоорай, Чульдум кудумчузу, 18, өрээл 107. Билдириишкиннерни ажыл хүннеринде хүлээр.