Тываның Баштыңы Владислав Ховалыг ажылчын сургакчылаашкын-биле эрткен дыштаныр хонуктарда Бии-Хем кожуунга чораан. «Аян-Агро» көдээ ажыл-агый бүдүрүлгези, «Бии-Хем» аныяктар төвү, культура албан черлеринге чедип, тускай шериг операциязының киржикчилериниң өг-бүлелери-биле ужурашкан.
Бии-Хем кожууннуң төвү Туран хоорайга Владислав Ховалыг ТШО киржикчилери Аржаан Сарыглар, Виталий Дайбов база оларның өг-бүле кежигүннери-биле ужурашкан. Кожуун чагырга даргазы Владимир Байыр-оол база ужуражылгага киришкен.
Аяк шайны аартап олура, өг-бүлелерниң айтырыгларын чугаалажып, ону шиитпирлээриниң аргазын сүмележип, ТШО киржикчилерин база оларның өг-бүлелерин деткиир хемчеглерни көрген. Владислав Ховалыг өг-бүлелер-биле харылзааны тудуп, болдунар-ла арга-биле оларга дузалажыр даалганы кожууннуң удуртулгазынга берген.
- Фронтуже ол ийи кижини салым-чолдуң аңгы-аңгы оруктары эккелген. Ынчалза-даа оларның кайызы-даа Төрээн чуртунга бердингени болгаш, тиилелгевис чоокшулап келгенинге бүзүрелдиг - деп, Баштың ужуражылга соонда бижээн.
Владислав Ховалыг Бии-Хемге чорааш, «Аян-Агро» КХН сүт-бараан фермазынга база четкен. Туранның чоогунда, шагда октаттынган ферманың орнунда бүдүрүлгени ажыткан. Туранчылар Тываның бот-тускайлаң социал-экономиктиг хөгжүлдези (ИПСЭР) күрүне программазы-биле алганы 21 млн рубльга тудугну катап тургузуп, сүт болбаазырадыр дериг-херекселдерни база көдээ ажыл-агый техниказын садып алган.
Тываның Баштыңы ажыл-агыйны чедип көргеш, ооң чедиишкинниг ажылынга бүзүреп, идепкейжи араттарны деткиксеп турарын чугаалаан. «Аян-Агро» КХН-ниң цегин ажыдарынга 200 баш сүткүр уксаалыг инектерни садып бээр даалганы берген.
Баштың «Бии-Хем» культура-дыштанылга албан черинге кожууннуң аныяктары-биле ужурашкан. Ийи чыл бурунгаар «Регион аныяктарга» президент конкурзунуң грантызы-биле төптү ажыткан. Эргиде муниципалдыг оран-сава ол акша-хөреңги-биле септеп-селиттинген.
Национал музейниң Сафьянов аттыг чурт-шинчилел филиалында капитал септелге кайы хире кылдынганын база хынаан. Ында ажылдар «Культура» национал төлевилел-биле чоруп турар.
Тываның Баштыңы орук ара, национал төлевилел күүселдези-биле септеп турар Өөк суурнуң көдээ культура бажыңынга доктааган. Культура бажыңында капитал септелге ажылдары октябрьда доостур ужурлуг.