Тыва үндезин культура төвүнге болуп эрткен байырлалга Тываның эң баштайгы парлалга үндүрүлгезиниң хоочуннары, ооң авторлары, өске-даа массалыг информация четкилеринден коллегалары, ол ышкаш республиканың аңгы-аңгы адырларының төлээлери “Тувинканың” коллективинге байыр чедирер дээш чыглып келгеннер.
Юбилейде чалаткан хүндүлүг аалчыларның бирээзи - Тываның Баштыңы Владислав Ховалыг 100 чылдаан солун – “Тувинская правда” редакцияның ажылдакчыларынга, хоочуннарынга база ооң хөй санныг номчукчуларынга байырны чедирген. Республиканың чурттакчы чонунуң ынак солунунуң доктаамал номчукчузу болбушаан, ооң ачазының фоточуруун парлаан ховар дээн бир солунну шыгжап чоруурун Тываның Баштыңы сонуургаткан.
Бөгүн «Тувинка» — чүгле саазын хевиринде эвес, а социал четкилерде электроннуг хевирде бодунуң номчукчуларын тыпкан массалыг информация чепсээ. “ВКонтакте” социал четкиде 23 муң кижи бижиткен, чурттуң өске регионнарында болгаш даштыкыда чурттап чоруур номчукчулар республиканың медээлерин бир дугаарында номчуурлар.
Владислав Ховалыг ажылга ындыг хөй талалыг хамаарылганы шын деп айтып, бирээзи өскезин деткиир ужурлуг деп демдеглээн:
«Социал четкилер сайзыраан-даа болза, массалыг информация чепсээ бодунуң ролюн салбаан. Оларның мурнунда нарын сорулгалар тургустунган. Номчукчуларының санын көвүдедири. Номчукчуга информация чедирилгезиниң амгы хевирлерин ажыглаар. Чогаадыкчы аныяктарны мергежилче хаара тудар» - деп, Тываның Баштыңы доктаамал өскерлип турар бо үеде республика солунунуң коллективи “Тувинская правданы” информастыг далайның шапкын агымынга бурунгаар углап баштап апаарынга бүзүрелин илереткен.
100 чылдаан юбилейде “Тувинская правда” редакцияның хоочуннарын, шылгараңгай ажылдакчыларны Тываның Баштыңының чарлыы-биле шаңнаан. “Тувинканың” шынчы бердинген хоочун ажылдакчызы, солунга 30 ажыг чыл ажылдаан Тываның алдарлыг журнализи Марина Кенин-Лопсанга “Шылгараңгай күш-ажылы дээш” деп медальды тывыскан. “Тыва Республиканың алдарлыг ажылдакчызы” деп хүндүлүг атка ук солуннуң корреспондентизи Ирина Качан төлептиг болган. Тываның Баштыңының Өөрүп четтириишкин бижии-биле улуг корреспондент Кирилл Самохваловту, Хүндүлел бижии-биле чыскаакчы Юнона Чоодуну шаңнаан.
Солуннуң байырлалынга Тываның Баштыңы Владислав Ховалыг, республиканың Дээди Хуралының (парламент) Даргазы Каң-оол Даваа, Тываның бир дугаар Президентизи Шериг-оол Ооржак база федералдыг болгаш республика албан черлериниң удуртукчулары, төлээлери, солуннуң номчукчулары, мөгейикчилери, журналистиканың хоочуннары келгеш, байырын чедирген.