Малчыннарның Наадым байырлалының үезинде Тыва үндезин культура төвү биле республиканың сайгарлыкчылар эвилели Тываның ус-шеверлериниң “Ус-Куш – 24” фестиваль-мөөрейин организастаан. Ус куш дээрге уязын боп-борбак, кирер аксын куду кылдыр чараштыр кылып алыр кончуг ус-шевер куш-тур.
“Ус-Куш” делгелгени Кызыл хоорайның Ленин кудумчузунуң эгезинде, Тыва үндезин культура төвүнүң баарында, мөөрейни сонуургап келген чонга кончуг эптиг черде ажыткан.
“Ус-Куш – 24-ке" хууда ус-шеверлер болгаш ус-шевер сайгарлыкчы чорукту сайзырадып турар биче бүдүрүлгелер киржип, боттарының кылган чараш ажылдарын делгеп салган. Чеден ажыг санныг ус-шеверлер болгаш биче бүдүрүлгелер фестиваль-мөөрейде киржип турар.
Ус-шевери-биле чонга ат-сураа алгыг мастер Херел Ооржак кончуг чараш кылдыр чазаан, тыва угулзалар-биле каастаан деспилер, аяктар, тавактар дээш малчыннарның хүн бүрүде ажыглап чоруур эт-севин делгеге көргүзүп киирген. Херел Очуровичиниң ажылдарын садып алыр күзелдиглер хөй болган, делгелге-мөөрейниң түңнелдерин үндүрүптерге, садыглажыр деп дугуржуп турдулар.
“Кузнечный двор Тувы” ус-шевер сайгарлыкчы чорук компаниязының демирден кылган ажылдары база көрүкчүлерниң сонуургалын хаара туткан. Тыва болгаш орус национал хээлер-биле каастап кылган дериг-херекселдерни, эт-септи садып алыксаар кижилер эвээш эвес-тир деп компанияның төлээзи Наталья Полева чугаалады.
Тывада ус-шевер чогаадыкчы чорук улам хөгжээн, ус-шевер сайгарлыкчы чорук сайзырап турары “Ус-Куш” фестиваль-мөөрейден көскү.