Малчыннарның Наадым байырлалының эң чараш, хөй кижилер сонуургап көөр болуушкуннарының бирээзи – тыва улустуң национал хүрежи. Бөгүн, июль 19-та, Кызылда “Хүреш” стадионга “Наадым – 24 -ке" тураскааткан хүреш маргылдаазы болуп эрткен. Ооң байырлыг ажыдыышкынынга Тываның Баштыңы Владислав Ховалыг киришкен. Наадымның хүреш маргылдаазынга 242 шилиндек мөгелер киришкен.
Хүреш маргылдаазын көөр дээш чыылган чонга болгаш мөгелерге Тываның малчыннарының Наадым байырлалы-биле байырны чедирип, бүгү чонга аас-кежикти, амыдырал-чуртталгага болгаш ажыл-ишке чедиишкиннерни ол күзээн. Хүрешти тыва улустуң национал культуразының үнелиг эртинези, ол чокта кандыг-даа улуг байырлал солун эвес дээрзин Владислав Ховалыг демдеглеп, “Наадым – 24-түң" хүреш маргылдаазынга эң-не күштүглер тиилезин деп чугаалаан.
Барык 8 шак дургузунда үргүлчүлээн чидиг сегиржип алыышкыннарның түңнелинде, Улуг-Хем кожуундан Арзылаң мөге Айдың Моңгуш шүүлген, Тес-Хем кожуундан Чаан мөге Сайын-Белек Түлүш үжүүрлешкен.
Тываның Баштыңы Владислав Ховалыг шүгген болгаш үжүүрлешкен, шаңналдыг черлерни ээлээн мөгелерге шаңналдарны тывыскан. Шүгген мөгениң шаңналы — “Нива” марканың автомашиназы.