Тываның Баштыңы Владислав Ховалыг «Эльбрусметалл» АН-ның чиңгине директору Евгений Балуков-биле ужурашкан. Ужуружалга Петербургтуң экономиктиг шуулганының үезинде ат салган дугуржулга езугаар кады ажылдажылганы уламчылаан. Компания 30 чыл дургузунда Эрзин кожуунда Тастыгдан чыдынын шиңгээдир чөпшээрелдиң ээзи. «Профессионалитет» федералдыг төлевилел-биле тус черниң специалистерин өөредип, бүдүрүлгени кадрлар-биле хандырарын база чугаалашкан.
ПМЭФ-2024 үезинде чарган дугуржулга езугаар, республиканың эрге-чагыргазы инвесторга төлевилел боттандырыышкынынга таарымчалыг байдалдарны тургузуп, ооң иштинде үндүрүг чиигелделерин бээрин боттарында хүлээнген. Компания, бодунуң ээлчээнде, Тываның чурттакчыларын ажылче хаара тударын мурнады шиитпирлээрин (ажылдакчыларның ниити санының эвээш дизе 30 хуузу), ол ышкаш бодунуң бүдүрүлгезинге ажылдаар кижилерни тускай сорулгалыг өөредип алырын хүлээнген.
- Бо арга бистиң аныяктарывыска амгы үениң арга-дуржулгазын болгаш улуг бүдүрүлгелерге ажылдаарының магадылалын бээр. Бо чүүл инвесторларны кадрлар чедишпезинден хостаар болгаш Саян ындындан специалистерни хаара тударының хереглелин эвээжедир» - деп, Владислав Ховалыг ужуражылга соонда бодунуң блогунда бижээн.
«Эльбрусметалл» АН Тываның Өөредилге яамызы-биле дугуржулганы чарып, «Профессионалитет» федералдыг төлевилелдиң албан езузу-биле партнёру апарганын Евгений Балуков дыңнаткан. Келир чылын, 2025 чылда төлевилел ёзугаар, 2023 чылдан бээр регионда ажылдап турар көдээ ажыл-агый өөредилге-бүдүрүлге бөлүү-биле дөмей, чаа бөлүк – Ак-Довурактың даг техникумунуң баазазынга дагжылар бөлүү республикага ажыттынар. Өөредилге албан чери чаарттынган өөредилге программазын киирип, чаа дериг-херекселди тургузуп, цехтер болгаш лабораторияларны эде чаартыр.
Холдингиниң удуртукчузу чурттуң дээди өөредилге черлеринде дагжы мергежилдерде өөренип турар Тываның студентилерин практикаже база ажылче хүлээп алырынга беленин бадыткаан. Ол ышкаш өске регионнарның бүдүрүлгелеринде вахталап ажылдап турар республиканың чурттакчыларын хаара тударынга инвестор белен.
«Профессионалитет» төлевилелдиң Тывада «даг-тывыш адыры» угланыышкынында партнерлар кылдыр «Лунсин» КХН, «Тардан-Голд» КХН, «Тываның даг-руда компаниязы» КХН база «Восток» КХН ажылдап турар. Кады ажылдажылгалыг бүдүрүлгелер төлевилел күүселдезинче 27 ажыг млн рубльди киириштиреринге белен. Ортумак профессионал өөредилге албан черлериниң баазазынга өөредилге-бүдүрүлге төптерин тургузарынга федералдыг бюджеттен 200 ажыг млн рубльди регионга тускайлаар.