Тываның Баштыңы Владислав Ховалыг Чөөн-Сибирь округтуң Арбитраж судунуң даргазы Светлана Антонова болгаш Тыва Республиканың арбитраж судунуң даргазы Владимир Ажы олар-биле ужурашкан.
Арбитраж судтарының даргаларының Чөвүлелиниң Тывага эртип турган чөвүлел хуралының айтырыгларын болгаш судтарның аразынга кады ажылдажылга дугайында ийи тала чугаалашкан.
Чөөн-Сибирь округтуң составынга хамааржыр 10 арбитраж судунуң даргаларының Чөвүлел хуралы июль 10– 12 хүннерде Кызылга болуп эрткен. Чуртта тургустунган байдалдарның аайы-биле хоойлү-дүрүмнер база дүрген өскерлип турар үеде Тывага болган чөвүлел хуралга чугаалашкан айтырыгларны сайгарып көөрү арбитраж судтарының ажыл-херээнге чугула дээрзин Светлана Антонова чугулалап демдеглээн.
Владислав Ховалыг Чөөн-Сибирь округтуң арбитраж судтарының даргаларының Чөвүлел хуралын Тывага эрттирер шиитпирни хүлээп алганы дээш Арбитраж судунуң даргазынга өөрүп четтиргенин илередип, ук хурал тус черниң арбитраж судьяларынга практиктиг ужур-дузалыг болурун чугаалаан.
«Тыва Арат Республиканың ССРЭ-ге каттышканының 80 чылын демдеглеп эрттирип, 2024 чылда Чөөн-Сибирь округтуң арбитраж судтарының даргаларының Чөвүлел хуралын Тывага эрттиргени бир янзы болуушкун» – деп, Владислав Ховалыг интернетте бодунуң арынынга бижээн.