РФ-тиң Президентизиниң Сибирь федералдыг округта бүрүн эргелиг төлээзи Анатолий Серышевтиң чанында оперативтиг штабтың хуралынга 2024 чылда Сибирьниң регионнарында өрт сезонунуң эртип турарын чугаалашкан.
2024 чылда өрт айыылының үези эгелээнден бээр, округтуң регионнар девискээрлеринде бүрүткеттинген бойдус өрттериниң саны 61 хуу эвээжээни, а ооң шөлү ийи катап кызырылганы демдеглеттинген. Тыва Республикада кургаг изиг агаар тургустунуп, арга-арыг өрттериниң байдалы нарыыдаанындан, хып турар шөлдерни элээн кызырары-биле, июль 1-де киирген “онза байдал” чурумун июль 9-та соксаткан.
2023 чылдың декабрьда база 2024 чылдың мартта, Ведомстволар аразының онза байдалдарны болдурбазының болгаш чайладырының талазы-биле комиссия хуралынга, өрт айыылының сезонунга белеткел айтырыын чугаалашканын Анатолий Серышев демдеглээн. «Ынчан ажылдап кылган шиитпирлерниң күүселдези арга-арыг өрттерин дыка дүрген өжүрерин чедип алган» – деп, бүрүн эргелиг төлээ чугаалаан.
РФ-тиң Хамааты камгалал, онза байдалдар болгаш бойдус халавының уржуктарын чайладыр херектер талазы-биле яамының июль 10-нуң байдалы-биле дыңнатканы болза, бо чылдың өрт айыылының үези эгелээнден бээр Сибирьниң регионнарынга 66 муң ажыг гектар ниити шөлдүг 1,3 муң өрттер бүрүткеттинген.
Регионалдыг диспетчер албанының дыңнатканы болза, июль 10-нуң хүнүнде Тывада 856,6 га ниити шөлдүг сес арга-арыг хып турган. Тожу кожуунда улуг өрттү өжүреринге Хакас Республиканың парашют-десант өрт албанының 10 ажылдакчызын хаара туткан. Июль 11-де республикага чаъстап эгелээнинден, хып турган черлер өшкен. Азы хып турар өрттерниң шөлү 291,1 га чедир кызырылган.
Анатолий Серышев Сибирь регионнарының Баштыңнарынга база федералдыг күүсекчи эрге-чагырга органнарының терриоториалдыг органнарынга өртке удур айыыл чок чорук негелделерин сагыырының талазы-биле хамаатыларга тайылбыр болгаш профилактика ажылын күштелдирер даалганы берген.
Тыва Республиканың Арга-арыг болгаш бойдус ажыглалының яамызының медеглээни болза, өрт айыылы эгелээн үеден бээр өртке удур айыыл чок чорукту сагыырынга 136 ажык кичээлди, 4322 беседа база лекцияларны эрттирип, 28411 хуудустарны тараткан. ТР-ниң Арга-арыг яамызының ажылдакчылары телевидениеге сес чугааны организастап, Интернет четкизинге 167 информастыг болгаш профилактиктиг медээлерни салган.
Ведомство оон аңгыда, регионда амгы үеде күштүг өртке удур онза чурумнуң дүрүмнерин сагыырынга арат-тараачын ажыл-агыйлары-биле 832 керээни чарган.