Владислав Ховалыг Тываның барыын кожууннарынга ажылчын сургакчылаашкын үезинде, школалар тудуу болгаш септелгези кайы хире чоруп турарын хынап, элээн каш социал объектилерге четкен. Хыналданың түңнелинде, тудугларның темпизин дүргедедир, ол ышкаш объектилерде ажылчын күштерниң чедишпезиниң айтырыын шиитпирлээр даалгаларны харыысалгалыг яамыларга болгаш муниципалдыг тургузуглар чагыргаларынга берген.
Бо чылын Тывада республикада «Кадык камгалалы», «Өөредилге» база «Культура» национал төлевилелдер шугуму-биле сес школаны тудуп, алды школаны, чеди кадык камгалал албан черлерин база алды культура объектилерин үндезини-биле септеп турарын сагындыраал.
«Көдээ черлерниң комплекстиг хөгжүлдези» федералдыг программа-биле Улуг-Хем кожууннуң Чодураа суурда тудуп турар 176 олуттуг школа – дарганың бирги доктааган чери ол. Бо чылдың декабрьда ооң тудуу доостур. «Прогресс» КХН тудугну хүлээнген. 1970 чылда ыяштан туткан эрги школаны 2021 чылда аварийлиг деп санаан.
Владислав Ховалыг тудуг шөлүнде ажылдарны хынап көргеш, ажылды дүргедедирин тудугжулардан негээн:
- Айыттынган үезинде чүгле школаны эвес, а ооң инфраструктуразын: котельная, арыглаашкын, суг чыыр черин база коммунал четки тудуун база доозар херек – деп, Тываның Баштыңы хыналда соонда бодунуң арынында бижээн.
Чадаана хоорайда 616 олуттуг тудугнуң үшкү каъдын дуглай берген болган. Ооң-биле чергелештир ханаларын тудуп үндүрүп турар. Суг дамчыдар база канализация четкизин салыр черин белеткээр ажылдар эгелээн.
“Өөредилге” национал төлевилелдиң “Школачы өөредилге системазының эде чаартылгазы” күрүне программазы-биле бо чылын республикада алды школаны үндезини-биле чаартып турар. Владислав Ховалыг үнүүшкүн үезинде оларның ийизин – Чөөн-Хемчикте Хөндергей биле Бай-Тайгада Тээли школаларын хынаан.
- Ажылдар ам-даа хөй. Уругларга болгаш башкыларга эң-не таарымчалыг байдалдарны тургузар дээш, ажылдарны шынарлыг кылыр херек – деп, В. Ховалыг септелгеде объектилерни эргээн соонда бижээн.
Тудуг шөлдеринде ажылдың графигин шыңгыы сагып турарын контрольга алырын Өөредилге болгаш Тудуг яамызынга онааган.
Тываның Баштыңы-биле чугаа үезинде, тудугжулар кадрларның чедишпези чидиг кол айтырыг деп айыткан. Чай дүжүптерге, тудугда ажылчыннарның саны ийи катап эвээжей берген. Кижилер хууда тудугларже база чоруп турар.
Владислав Ховалыг тудугларже ажылчын күштерни хаара тударының аңгы-аңгы аргаларын ажылдап кылыр даалганы Тываның тудуг яамызынга база кожуун чагыргаларынга берген.