Сибирь федералдыг округда Россия Федерациязының Президентизиниң бүрүн эргелиг төлээзиниң чанында Чөвүлел база «Сибирь дугуржулгазы» РФ-тиң субъектилериниң экономиктиг кады ажылдажылгазының регионнар аразының ассоциациязының Чөвүлели «Россия» делегейниң делгелге-шуулганының шөлүнге каттышкан хуралды эрттирген. 2035 чылга чедир СФО социал-экономиктиг хөгжүлде стратегиязын боттандырар планның кайы хире чоруп турарын аңаа сайгарган. Бо чылын 120 хире хемчегни боттандырар.
Документиде 17 триллион рубль ниити инвестиция хемчээлдиг 299 улуг инвестиция төлевилелдери кирген. СФО-да Президентиниң бүрүн эргелиг төлээзи Анатолий Серышев инвесторларның мурнунда бергелерни даштыкы – хоруушкуннар уржуундан тыптып келген база эрге-чагырга органнарының чогуур дузазы-биле регионга шиитпирлеп болур иштики ажылдар деп чарган.
«Стратегия боттандырылгазының планында кирген төлевилелдер регионга болгаш бүдүн округка чугула деп чүүлден үнер ужурлуг бис. Ынчангаш күүсекчи эрге-чагырга болгаш тус чер чагырга органнары инвестиция төлевилелдериниң эгелекчилери-биле хостуг, ажылчын болгаш үре-түңнелдиг ажылдаары чугула. Дилеглерге харыылар дүрген болгаш үре-түңнелдиг болур ужурлуг» - деп, Анатолий Серышев онзалап демдеглээн.
Россияның Президентизиниң даалгазы-биле чаа национал төлевилелдерни тургузары болгаш күрүне программаларын чаартыры амдыызында акшаландырыышкын-биле хандыртынмаан объектилерге бюджет акшаландырыышкынын чорудар арганы берип турарын бүрүн эргелиг төлээ демдеглээн. Регионнар федералдыг эрге-чагырганың деткимчезин алыр дээш, херек документилерни болгаш үндезиннерни шынарлыг белеткээр ужурлуг. Бо ажылдың чугула талазы – регионнарның аразында сырый демнежилге болгаш эң эки ажыл-чорудулганы солчуру.
Регионалдыг эрге-чагырга органнарының төлээлери амгы Планга немей боттарының материалдарын белеткеп алганын демдеглээн. «Бо санал-оналдарны эртемденнерниң болгаш эксперттерниң санал-оналдарын барымдаалап, сайгарып, херек апарза, немей кылыр херек» - деп, бүрүн эргелиг төлээ чугаалаан. Келир үеде оларны Сибирь дугуржулгазы регионнар аразының ассоциациязының дүүштүрүлге чөвүлелдеринге чогуур федералдыг күүсекчи эрге-чагырга органнарының киржилгези-биле сайгарар, ооң соонда оларны РФ-тиң Чазаанче чорудар.
«Россия» делегей делгелге-шуулганга Сибирь регионнарының киржилгезиниң түңнелдерин база аңаа үндүрген. Сибирьниң девискээрлерин төлептиг төлээлеп турары дээш регионнарының удуртукчуларынга, хемчеглерни организастаарынга деткимчези болгаш дузазы дээш Делгелгениң дирекциязынга өөрүп четтиргенин илереткен.
«Сибирь дугуржулгазы» деп регионнар аразының ассоциациязының чөвүлел хуралында, Красноярск крайның губернатору Михаил Котюковту МАСС Чөвүлелиниң даргазынга соңгаан. Иркутск облазының губернатору Игорь Кобзев биле Томск облазының Хоойлужудулга Думазының даргазы Оксана Козловскаяны оралакчылары кылдыр бадылаан.
Россияның Президентизи Владимир Путинниң чарлыы-биле “Россия” делегей чергелиг делгелге-шуулганны организастаан. Ол хемчег Москваның ВДНХ-да эртип, Россияның кол чедиишкиннерин көргүзүп турар. Россияның шупту 89 регионун, кол федералдыг ведомстволарны, корпорацияларны болгаш хөй-ниити организацияларын төлээлээн 132 экспозиция бар. Бо хүнге чедир делгелгени 17 миллион ажыг кижи сонуургап көрген.