ТР-ниң хамааты камгалал база онза байдал албанының оперативтиг медээзинден алырга, Кызыл, Бии-Хем, Тожу, Каа-Хем, Таңды база Улуг-Хем кожуун девискээрлеринде республиканың арга-арыг фондузунуң черлеринде 1825,5 га ниити шөлдүг 21 арга-арыг өрттери хып турар.
Онза хайгааралдыг бойдус девискээрлери - «Убсунур ыйгылаажы» база «Азас» заповедниктерде 43 га ниити шөлдүг ийи өрт бар.
Эрткен хүнде Улуг-Хем биле Таңды кожуун девискээрлеринде 11,3 га шөлде ийи өрттү өжүрген.
Авиаөртчү, арга-арыг өрттеринге удур албан база арга-арыг камгалалының ажылдакчыларындан 210 кижи өрттер өжүреринде киржип турар.
Арга-арыг өрттери колдуунда-ла кургаг чаңнык дүшкенинден өөскүп турарын дыңнаткан.
Июльдуң 1-ден Тывада хамаатыларны арга-арыгже киирерин кызыгаарлаан онза байдал чуруму чарлаттынганын сагындыраал.