Дайынчы даалгаларны күүседип тургаш, амы-тынындан чарылган тускай шериг операциязының киржикчилериниң өг-бүлелеринге Тывада чаа деткимче хемчээн киирген. Ам олар республикада амгы үеде туттунуп турар чаа тудугларда квартиралар садып алырда, тускай беш хуу чиигелдени ажыглаар.
Тываның Баштыңы Владислав Ховалыг бо чылдың январьда Дээди Хуралга Айыткалын берип тура, бо категорияның өг-бүлелеринге ачы-дуза чедирериниң аргаларын тудугжулар-биле ажылдаар көөр дугайында айтыышкынны регионалдыг Тудуг яамызынга бергенин сагындыраал. «Олар (мөчээннерниң өг-бүлелери) бистиң онза хайгааралывыска турар ужурлуг» - деп, Тываның Баштыңы ынчан демдеглээн.
Регионнуң Тудуг яамызының дыңнатканы-биле алырга, бо хүнге чедир комплекстиг чуртталга тудуунга киржип турар яамы болгаш тудуг компаниялары шериг албанын эрттирип тургаш чок болган шериг албанныгларның өг-бүлелеринге чиигелделерни бээри-биле чогуур немелде дугуржулгаларны чарган.
«Новый город», «Трансстрой БК», «Бастион», «Регионстрой», «Кызылстрой», «Олчей-Кежик», «Спутник», «ДКС», «Бай-Хаакская», «Восток», «Орион», «НИН», «Атроник-Сервис» деп тускай тудуг черлери-биле шупту 18 дугуржулга чардынган.
Ынчап кээрге, «Спутник» компания боттарының инвестиция төлевилелиниң бирги чадазында, ол-ла ат-биле тудуп турар «Спутник» микрорайонунда беш каът хөй квартиралыг үш бажыңны 2024 чылдың төнчүзүнге чедир тудар. Бо хүнде тудуг чери боттарының тудугларында үш өрээлдиг квартираларны беш хуу чиигелде-биле садарынга белен. 50-ден 68 дөрбелчин метр чедир шөлдүг, 43 квартираны садыглажылгаже салган.
Чаа бажыңнарның чанынга 825 олуттуг чаа школаны тудары, ол ышкаш ийи уруглар садтарын, немелде өөредилге, спортчу, хереглекчилер ачы-дузазының, садыг-саарылга объектилери дээш, оон-даа өске таарымчалыг чурттаарынга таарымчалыг бүгү-ле херек инфраструктураны чаа микрорайонга тудар.
«Берге үеде чурттап чоруурувусту, кандыг шаптараазыннарга таваржып турарывысты шупту эки билир бис. Ынчангаш ниити ажылга боттарывыстың бичии-даа болза үлүүвүстү киирип турарывыска өөрүп тур бис» - деп, «Спутник» тудуг компаниязының коммерция талазы-биле директору Ай-Хаан Догур-оол чугаалаан.
Бөгүн өг-бүлелер деткимчениң чаа хемчээн чүгле сонуургап эвес, а ажыглааннар база бар деп, тудуг яамызы дыңнаткан.
«СВО киржикчизиниң өг-бүлези Спутник микрорайонунда ийи өрээлдиг квартираны “тыва” ипотеканы ажыглап, чиигелделиг негелде-биле садып алыр аргалыг. «Кызылстрой» КХН тускай тудуг организациязы база акцияны чарлап, 9,93 хуу чиигелделиг өртек-биле квартираларын садып турар. 2025 чылдың төнчүзүнде олар чаа чуртталга бажыңнарынче кирер» - деп, ведомство дыңнаткан.
Чок апарган СВО киржикчилериниң өг-бүлелеринге беш хуу чиигелдени берип турар тудуг черлериниң долу даңзызын, чарган дугуржулгаларын, ол ышкаш чиигелдеге хамааржыр өнчү-хөреңги объектилерин Тываның Тудуг яамызының сайтызында дараазында https://минстрой.ртыва.ру/узел/31021/ шөлүгден таныжып болур.