«Туризм болгаш хүндүлээчел чорук индустриязы» нацтөлевилел база ИПСЭР ачызында, республиканың эштир черлерин чаагайжыдып, кемпингилерни тудуп база турисчи хүрээлеңни экижидер аргалыг болган. Чүгле эрткен чылын Тыва ол сорулгага 43 ажыг млн рубль федералдыг деткимчени алган.
Тускайлаан акша-хөреңгиге Национал паркта эштир черни чаагайжыдып турар. Туризм агентилелиниң дыңнаадыы-биле алырга, эмнелге пунктулуг база дериг-херекселдер хөлезилээр черлиг административтиг оран-саваны тудуп, эштир черже элезинни сөөртүп, суг саартынар кабинкаларны база камгалакчылар бедигээжин тургузуп, чайгы кафени, видеохайгараал база дыңнадыышкын системаларын кылып дооскан. Росхереглелхайгааралының сугга база элезинге хынаан лабораторлуг шинчилелдериниң харыызын манап турар.
Ол ышкаш Чагытай хөлде эштир чер ажыттынар. Солуттунар кабинкаларны, көжер арыгларын черни, суг саартынар дөрт кабинкаларны, беш беседканы тудуп кылгаш, хемени саткан. Хөлдүң эриинде эмнелге пунктузун, модульдуг бажыңчыгашты, хөлезилел пунктузун, хайгаарал доскуулун тургускан. Эштип дыштанып келгеннерге - 30 санныг чыдар болгаш хөлегеленир херекселдерни тургузуп, девискээрни долгандыр камгалаан.
Инвесторлар Азас хөлдүң эриинде чогуур ажылдарны кылып, эштиринге херек дериг-херекселдерни саткан. Эштир черни шинчилеп, дүвүн аштаан. Республиканың хереглекчилерниң хайгаарал төвү-биле анализтер алырынга керээни чарган. Июль 1-де пляж ажылдап эгелээр.
Тускайлап, дериттинмээн черлерге эштири айыылдыг дээрзин сагындыраалыңар. Майның эгезинден бээр Тываның хемнер, хөлдер база сугларынга тос кижи дүшкен, оларның чедизи эзирик турган деп, регионалдыг ОБЯ дыңнаткан. Сөөлгү таварылга - июньнуң 18-те Сарыг-Септе Каа-Хемге 31 харлыг аныяк кижи сугга дүжүп, чок болган.