Чурттуң камгалал сайыды, Россияның Маадыры Сергей Күжүгетович Шойгу «Алдын сылдыс» медальды биче сержант Буян Кууларга тывыскан. Тускай шериг операциязының үезинде ол харылзаа черинче, удурланыышкынның белдирлеринче болгаш украин боевиктерниң өске-даа чугула объектилеринче шаап халдаарының талазы-биле дайынчы даалганы күүседип турган.
" Улуг Тиилелге хүнүнүң бүдүүзүнде эң-не өөрүнчүг медээни чонум-биле үлежикседим. Эр кижиниң Ада-чуртун камгалаар ыдык хүлээлгезин күүседип чоруур коргуш чок, эрес-дидим бистиң тыва оглувус Буян Куулар Россияның Маадырының Алдын Сылдызынга төлептиг болуп, Тыва чуртунуң, тыва чонунуң, төрел аймааның алдар адын бедик тутканынга, шупту чоргаарланып тур бис. Дээди кол командылакчының шиитпири-биле Россия Федерациязының Маадыры деп дээди атты тывысканы-биле Буянга байырны Россияның Маадыры Мерген Доңгак-биле кады чедирдивис! Мырыңай удавас Маадырның Сылдызын улуг лейтенант Чалым Чүлдүм-оол база алыр. Ону чоокку хүннерде, Улуг Тиилелге Хүнүнүң бүдүүзүнде тыпсыры көрдүнген" — деп, Тываның Баштыңы бодунуң социал четкиде арнында бижээн.