Ачы-дуза акциязы өскүс уругларның, кадыкшыл байдалы кызыгаарлыг уругларның, хөй ажы-төлдүг өг-бүлелер уругларының база ТШО киржикчилери – шериг албанныгларның база мөөңнээшкин-биле кыйгыртканнарның ажы-төлүнүң күзелдерин боттандырар. Сайыттар, эрге-хоойлу тургузугларның удуртукчулары, депутаттар болгаш өске-даа энерел сеткилдиг кижилер уругларның күзелдерин боттандырарынга үлүүн киирерлер.
«Күзелдер Шивизи» акцияны Баштайгыларның шимчээшкини удуртуп башкарып турарын демдеглээлиңер. Тываның шериг комиссары Демир-оол Артына ыраккы Мөңгүн-Тайганың Кызыл-Хая суурундан 15 харлыг От-Суренниң акустикалыг гитара алыксаан күзелин шилип алган. Шериг комиссары Чаа чылдың белээ үе-шаанда чеде бээрин дыңнаткан.
12 харлыг Аюша Тываның иштики херектер яамызының бажыңын сонуургаан күзели душ бооп Тыва Республикада иштики херектер сайыды, полицияның генерал-майору Сергей Кондрашовка таварышкан.
Россияның федералдыг айыыл чок албанының Кызыгаар эргелелиниң начальниги Владимир Матвеев Таңдыдан 12 харлыг Долзатка чадаг-тергени, Росгвардияның Тыва Республикада эргелелиниң начальниги Александр Новосёлов 5 харлыг Даримага белекти чедирерлер.
«Тывада акцияның ажылын дүүштүрүп турар «Баштайгыларның шимчээшкининиң» активчилери Иван база Менги-биле таныжып алдым. Эр-хейлер! Бүгү-российжи ачы-буян төлевилелин идепкейлиг деткип, бистиң ажы-төлүвүстүң ыдык күзелдерин амыдыралга ботандырарынга чылдың-на киржип турар кижилерниң шуптузунга четтиргеним илереттим» – деп, Владислав Ховалыг демдеглээн.
«Мээң-биле кады күзе» деп бүгү-российжи ачы-буян төлевилелиниң «Күзелдер Шивизи» акциязы 2018 чылдан бээр бүгү Россияның девискээринде боттанып турарын сагындыраал. Амыдыралдың берге байдалынга таварышкан уругларга өөрүшкүнү сөңнеп, тоолчургу Чаа чылды көргүзери – акцияның сорулгазы.
«Шын» солун