Тыва «Забег.РФ» бүгү-российжи чартык марафонга каттышкан

Майның 19-та бүгү чуртка «Забег.РФ» чадыг чарыш болуп эрткен. Тывага беш дугаар эрткени ол.

- Бөгүн Тыва "ЗаБег" улуг спортчу хемчегниң киржикчизи болган. Чартык марафон 16 чуртту каттыштырып, 180 муң ажыг киржикчилерни хаара туткан. Массалыг улуг спортчу байырлалды организастааны дээш Ксения Шойгунуң командазынга байыр чедирип тур мен! –деп, республиканың Баштыңы Владислав Ховалыг киржикчилерге байырны чедирген.

Конкурстуң организаторлары чыл санында чарыштың киржикчилери көвүдеп турарын демдеглээн. Бо чылын профессионал спортчулар база маңнаарынга ынак 1000 хире кижи Кызылдың төвүнден деңге чаржып үнген.

Марафонга 7 хардан өрү назылыг Кызылдың чурттакчылары болгаш аалычылары киришкен. Боттарның шыдал-күжүн көрүп, 1, 5, 10 база 21 километр хемчээлдиң чарыжынга боттарын шенээн.

Ольга Ондар из Улуг-Хем кожуундан Ольга Ондар улуг назылыг маңчыларның бирээзи. Ол бо чылын 64 харлаар, ол хире назылыглар аразында 21 километр хемчээлде чаңгыс херээжен спортчу. Маргылдааның дүрүмү база киржикчиниң күзели-биле 18-44 харлыг херээжен маңчылар аразынга киришкеш, дөрткү черни төлептиг ээлээн. Ольга маңнаарындан аңгыда, хаак база скайрайниг спортун сонуургаар. Чүгле бо чылда 24 маргылдааларга киришкен.

Марафонга бүдүн-бүдүн коллективтер база өөредилге черлери идепкейлиг болганын Тываның Спорт яамызы демдеглээн. Федералдыг үндүрүг албанының Тывада эргелели, Просвязьбанк, адаптивтиг спорттуң школазы база Кызылдың президентиниң кадет училищезиниң сургуулдары – маргылдааның доктаамал киржикчилери.

21 километр хемчээлдиг чарышка Сат Айдын, херээженнерден – Кувезин Айгуль кымны мурнай финишке келгеннер.

Аңгы-аңгы бөлүктерге эң эки көргүзүглерлиг 50 спортчуну дипломнар, медальдар-биле шаңнап, марафоннуң спонсорларындан спортчу чемнерни тывыскан.