11.06.2014
Айыылдыг өрт үезинде амы-тынындан чарылган десант оолдарның аттарын бижээн тураскаал-самбыраның байырлыг ажыдыышкынын июнь 6-да Кызылга эрттирген. Аңаа ТР-ниң Чазааның төлээлери, Бойдустуң халаптарын чайладыр албан чериниң ажылдакчылары болгаш школачылар база оолдарның ада-иелери, төрелдери сактыышкын езулалынга келген.
2012 чылдың июнь 6-ның хүнүнде Бай-Тайганың Кара-Хөл сумузунуң девискээринге өөскээн өрт үезинде амы-тынындан чарылган десант оолдарның өг-бүлелеринге моральдыг болгаш материалдыг дузаны Тываның Чазаа көргүскен. Төрээн чериниң делгемнерин өрттен камгалаар дээш чырык өртемчейден чарлып чоруткан маадырларывыс: Кызыл хоорайдан Радион Хуурак, Тожудан Андрей Шилин, Шагаан-Арыгдан Херел Кызыл-оол, Сергей Федотов, Николай Былев, Виктор Стремоусов, Николай Новиков, Владимир Кечил-оол, Борис Оюн оларның чырык ады кезээде уттундурбас болуп артар база оларның өг-бүлелери-биле кады демниг болур бис, оолдарның эрес-дидим чоруун үнелеп, кезээ-мөңгези-биле артар тураскаалды кылган – деп, Тываның Чазааның Даргазының оралакчызы Сергей Огнев чугаалаан соонда кажыыдалдың минутазын чарлады.
Митинг үезинде Радионнуң ачазы Юрий Хуурак оглунуң дугайында сактыышкынны чугаалап база Тываның Баштыңы Шолбан Кара-оолга материалдыг дузаны көргүскени дээш четтиргенин илереткен.
Республиканың девискээринге 1996 болгаш 2012 чылдарда болган өрт айыылынга маадырлыы-биле амы-тынындан чарылган оолдарның аттарын бижээн тураскаалды шып каан ак шывыгны Сергей Огнев биле Юрий Хуурак камныы-биле дүжүргеннер. Сактыышкын езулалында албан черлериниң төлээлери болгаш десант оолдарның кады ажылдап чораан эш-өөрү, ада-иелери, төрелдери боодал чечектерни мемориал самбыраның мурнунга салган.
Бойдустуң айыылдыг халавының уржуундан аныяк-чалыы назынындан чарылган оолдарның чорутканы чүгле кады төрээннеринге, чоок кижилеринге эвес, тыва чонга «балыг» болуп арткан. Даанган хүлээлгезин күүседир дээш маадырлыы-биле мөчээн 16 десант оолдарның алдар адынга тураскааткан самбыраны Кызыл хоорайның Московская кудумчузунда, аэропорт девискээринде тургускан.
Анисья Тюлюш.
Чингис Сааяның тырттырган чуруктары.