РФ-тиң Чазааның Даргазы деткээн
09.04.2014
Россияның кезек регионнарга, ооң иштинде Тывага, немелде акша-хөреңгини үндүрүп бээриниң дугайында айтыышкынга ат салган
Россияның Тудуг яамызының белээткен документизин Чазактың хуралынга сайгарып көргеш, деткээн.
Дмитрий Медведев 2014 чылдың март 31-де Россияда күрүнениң болгаш муниципалдыг хуу өнчүнүң капиталдыг тудуг объектилеринге: 2014 чылда — 1 млрд. 354 млн., 2015 чылда — 3 млрд. 319 млн., 2016 чылда — 3 млрд. 446 млн., а ниити — 8 млрд. 143 млн. рубльди чарыгдап, федералдыг кады акшаландырыышкын дугайында доктаалга атты салган.
Бо акша-хөреңгини капиталдыг тудуг объектилеринге база федералдыг субъектилерниң тураскаадыг үелерин федералдыг деңнелге байырлап демдеглээр дараазында хемчеглерни кады акшаландырарынче угланган:
— Омск хоорайда инженер инфраструктуралыг тудуг объектизинге;
— Тыва Республиканың Кызыл хоорайда Енисей хемниң эриин көвүрүгден Чургуй-оол кудумчузунга чедир чаартып дерииринге болгаш ооң чоок-кавы девискээрин чаагайжыдарынга;
— Томск хоорайда Томь хемниң оң талакы эриинде көшке бадар айыылдыг черлерге баш бурунгаар камгалал хемчеглерни чорударынга.
Россия биле Тываның демнежилгезиниң 100 чыл оюн федералдыг деңнелге байырлаарының дугайында ТР-ниң Чазааның Баштыңының 2011 чылда киирген саналын ол үеде Күрүнениң баштыңы турган Дмитрий Медведев деткээн турган.
Возврат к списку
|