Тиилелге шөлүнге

Афганистандан совет дайынчыларны үндүргенинден бээр 25 чылын демдеглеп турар. Ол дээрге чурттуң шериг төөгүзүнүң арыннарында таңмаланып арткан болуушкун. 

Совет шериглерни Афганистандан үндүрген хүнү кылдыр февраль 15-ти каш чыл бурунгаар доктааткан. Ол шиитпирни Россияның хөй язы-сөөк чону база афганчыларның эвилелдери  чүүлдүгзүнүп деткээн.

Февраль 14-те, 12 шакта найысылалдың Тиилелге шөлүнге Ада-чурттуң кызыгаарындан дашкаар албан хүлээлгезин күүседип чораан шериглерни база дайын шөлүнге маадырлыы-биле тулчуп тургаш, хары черге  бажын салган оолдарны  сактып, хүндүткелдиң, мөгейигниң езулалын эрттирген. Аңаа ТР-ниң Чазааның төлээлери, дайынның киржикчилери, шериг кижилер, хоорай чагыргазының болгаш аңгы-аңгы албан черлериниң ажылдакчылары, афганчыларның чоок төрелдери киржип, Тиилелге шөлүнде тураскаалга боодал чечектерни салган.

Олардан аңгыда РФ-тиң «Дайынчы акы-дуңмалышкы» хөй-ниити организацияның Тывада салбырының кежигүннери, «Чаңгыс демниг Россия» партияның болгаш «Бүгү-Россияның улусчу фронтузунуң» төлээлери, хөй-ниити организациялары, Кадеттер корпузунуң болгаш Кызылдың №2, 4 школаларының өөреникчилери сактыышкын езулалынга киришкен.

Тывада Кадеттер корпузунуң болгаш Кызылдың №12 школазының шериг-патриотчу клувунуң өөреникчилери Тиилелге шөлүнде тураскаал чанынга хүндүлүг таңныылга турганнар.

Интернационалчы дайынчыларның маадырлыг чоруу бистиң чүректеривиске кезээ мөңгеде артар.

Анисья Тюлюш.