12.02.2014
Шүлүкчү башкы Нина Эртинениң 50 харлаанынга тураскааткан «Кызыл-Дагның сылдызы» деп кожуун чергелиг мөөрей Николай Танзын аттыг көдээ Культура бажыңынга бедик деңнелге эрткен. Ыры мөөрейи эгелээриниң бетинде мугур хар харлап турар башкының амыдыралчы болгаш күш-ажылчы намдары-биле көрүкчүлерни таныштырган.
Нина Түлүшевна бойдустан дески салым-чаяанныг болуп төрүттүнген: шүлүкчү, танцычы, чурукчу, спортчу, даараныкчы, аргыкчы. Хаакка маңнаарынга, баскетбол ойнаарынга кожуунда кым-даа аңаа четпес. Хүндүткелдиг башкы өөредилге эргелекчилеп, директорнуң оралакчызы болуп, класс удуртукчузу, херээженнер чөвүлелиниң даргазы болуп үре-түңнелдиг ажылдаан. Шынап-ла, ажыл-иштиң кандыызындан-даа чалданмас кижи. Сиген кезип турда, эр кижилерден чыда кагбас. Школада шүлүк, чогаалга сонуургалдыг уругларны «Сылдысчыгаш» бөлгүмче хаара тудуп, хөй чылдарның дургузунда ону билдилиг удуртуп, хөй-ниити ажылынга идепкейлиг болурунга өөреникчилерге төлептиг чижек болуп чоруур. Көдээ сумуга мындыг идепкейжи башкы кижизидилге ажылының идегелдиг шимчедикчи күжү-дүр дээр болза, хөөредиг болбас. Тос-он чылдарның дургузунда улустуң ажы-төлүнүң уран чогаалга сонуургалын оттуруп, чараш чүүлче чүткүлдүг болурун кижизидип чоруур талантылыг башкывыска суур чону чоргаарланыр бис.
Класс башкылары, ада-иелерниң мурнундан школа директору А.Ч.Сенди мугур харлаан башкыга байырны чедирип, суй белектерни сөңневишаан, удавас кожуунга эртер башкылар хуралынга Нина Түлүшовнага «РФ-тиң өөредилгезиниң хүндүлүг ажылдакчызы» атты тыпсырының дугайында солун медээни чыылганнарга дыңнаткан.
Байырлалды «Кызыл-Дагның сылдызы» ыры мөөрейи уламчылаан. Ону үш аңгы бөлүкке эрттиргеш, түңнелин үндүрген. Тиилекчилер Шыдыраа Түлүш, Арзылаң Дагба, Ай-Херел Бүрүнмаа, Солаңгы Кандан олар болган. Сай-Суу Дамба, Алдын-Белек Хува дээн ышкаш школачыларның ыраажы салым-чаяаны өзүп орары өөрүнчүг.
Суурувустуң сураглыг ыраажылары Сылдыс Минчит-оол база Аңгыр, Амыргалаар Монгуш алышкылар Нина Түлүшовнага болгаш бичии ыраажыларга аян туткан.
Римма КОМБУЙ-ООЛ. Чаа-Хөл кожуун. Булуң-Терек суур.