ТЫВАНЫҢ БАШТЫҢЫНЫҢ АЙЫТКАЛЫ

Декабрь 20-де, Тываның Баштыңы Шолбан Кара-оол республиканың Дээди Хуралынга бо чылдың Айыткалын кылган. Девискээрниң удуртукчузу төнүп турар чылда кылган ажылдың түңнелдерин үндүрген, келир 2014 чылда болгаш оон ыңай үеде сорулгаларны тодараткан.

Республиканың парламентизиниң болгаш Чазааның каттышкан хуралынче шупту муниципалдыг тургузугларның, улуг бүдүрүлгелерниң, федералдыг органнарының девискээр салбырларының удуртукчуларын, Хөй-ниити палатазының кежигүннерин, хөй-ниити организацияларның болгаш шажын-чүдүлгениң ажылдакчыларын, республиканың массалыг информация чепсектериниң редакторларын чалаан.

Тыва биле Россияның чаңгыс демнежилгезиниң 100 чылынга, Кызыл хоорайны үндезилээниниң 100 чылынга тураскааткан 2014 чылда федералдыг чергеге байырлап эрттирер юбилейлиг байырлалдарга белеткелге Тываның Баштыңының эрткен чылгы Айыткалынга саналдааны төлевилелдерни канчаар боттандырып турарынче улуг кичээнгейни бо чылгы Айыткалда угландырган. Байырлалдың бүдүүзүнде республиканың найысылалында элээн каш чаа тудугларны тудуп, эрги объектилерни чаартып турарын сагындырып каалы. Оон аңгыда Тываның 124 суур бүрүзүнге чаа бүдүрүлгени тургузар сорулгалыг «Чаңгыс суур – чаңгыс бүдүрүлге» төлевилелди 2013 чылда боттандырып кирипкен. Бо төлевилелди херек кырында боттандырып турарынга республиканың удуртукчузу доктааган. Тудуп дооспаан болгаш эргижирээн, ажыглаттынмайн турар бажың-балгаттан хоорайларның болгаш суурларның девискээрин аштаарын база Шолбан Кара-оол негээн. Тываның Баштыңының саналдааны төлевилелдерниң күүселдези бо чылгы Айыткалдың кол чүүлдериниң бирээзи болган.