Садып алыкчының күзелинге чагыртыр

«Сүбедей» спорт комплекизинге эрткен делгелгениң база бир киржикчизи «Tyva Present» бүдүрүлге чери. Ооң удуртукчузу Саин Павлович Чимиттиң башкарылгазы-биле 4 ажылдакчы алгы-кештен документилер, акша, дүлгүүр хаптары, суй белектер, курлар дээш, оон-даа өске чүүлдерни кылып турар. Оларның бараанын делгээн черде оочурлаан садып алыкчылар хөй. Оозун бодаарга, республиканың чурттакчыларынга Тываның сүлде-демдээн айыткан азы «Тывага бүдүрген» деп сөстерни сиилбээн барааннар сонуурганчыг болуп турар.

Саин Чимит эрткен чүс чылдың 90 чылдарда Моол күрүнеге студентилеп турган. Ол үеде Россияга акша-шалыңны ай-айы-биле бербес, черле амыдырал ниитизи-биле нарын турган. Саин ада-иезиниң берге байдалын билип, акша-көпеек немей ажылдап алыры-биле Моолдуң даараныр фабриказынга ажылдап эгелээн. Ооң аңаа шиңгээдип алган арга-дуржулгазы амгы үеде сайгарлыкчы чоруунга улуг салдарны чедирген. Ол хенертен бүдүрүлге черин ажыдып албаан, а 15 чылдарның дургузунда өскелерден өөренип, арга-мергежилин сайзырадып келген. Ам ооң бүдүрүлгези шуудаан. ТР-ниң Экономика яамызының тускай программазы езугаар акшаландырыышкын дузазы-биле даараныр машиналарны садып алган. Келир чылдың чайга чедир ажылдакчыларның санын 40-50 чедир көвүдедирин планнап турар.

«Tyva Present» белен бараанны тарадыры-биле чергелештир хууда кижилерниң болгаш албан черлериниң чагыы-биле база ажылдап турар. Чижээлээрге, хамаатының чагыы езугаар «Иван Ивановтуң шынзылгазы» деп сөстерни документ хавынга сиилбип берип болур. Хууда кижиниң күзели-биле кандыг-даа чүүлдү бүдүрер боорга ындыг ийикпе, чондан чагыглар шуут соксавас. Ооң аңгыда барааннарның шынары бедик, өртээ чиик. Ортумак өртектер 20 рубльден 1000 рубльге чедир.

Саин Чимиттиң сайгарлыкчы чоруунуң кол дүрүмү: бараан бүдүрүлгези садып алыкчының күзелинге чагыртыр. Кижиниң садып алыксаан чүүлү чараш, шынарлыг, ажыктыг, чиик өртектиг болур ужурлуг. А сайгарлыкчы кижи бодунуң бараанын ийи-чаңгыс черлерге делгепкеш, ынаар ырак булуңче чажырып кааш орбайн, бизнестиң чедиишкинниг хөгжүлдезиниң аргаларын хүн бүрүде дилеп, кызымаккай ажылдаар апаар.

Садып алыкчының күзелдерин билип, оларның-биле сүмележип, сырый харылзааны тудар дээш билдингир социал четкиде «Tyva Present» бүдүрүлге чериниң арынын Саин Чимит ажыткан. Ында чагаалар, дыңнадыгларны сайгарып көөрге, Саинниң бүдүрүлге чери чүгле Тываның чонунга эвес, а өске-даа чурттарның улузунга сонуурганчыг болгаш херек. Ында чагыглар, күзээшкиннер, сүмелер эңдерик. Оон алгаш көөрге, «Tyva Present» бүдүрүлге чери моон соңгаар чүгле бурунгаар сайзырап, Тываның онзагайы сиңниккен, катаптаттынмас чараш барааннары-биле садып алыкчыларны өөртүрүн уламчылаар-ла боор.

Азияна Тау.

"Шын" солун