Тыва – Амур облазынга

Тываның Баштыңы Шолбан Кара-оол күштүг үерлээшкинниң түңнелинде шыңгыы когараан Амур облазының чурттакчы чонунга дуза көргүзери-биле республиканың курлавыр фондузундан акша-хөреңгини тускайлап бээриниң дугайында Айтыышкынга ат салган.

Россияның Онза байдалдар яамызының удуртулгазы-биле дугуржулга езугаар дүүн, август 1-де, Тыва Республикадан Амур облазынче 10 тонна савалаан ижер сугну чоруткан. Тываның Баштыңының демдеглээни-биле алырга, ижер суг – бирги хереглелдиң чүүлү болганда, когараан районнарга кайы-даа үеде ооң чедишпейн баары демдеглеттинип болур. Тываның Баштыңы Шолбан Кара-оол Амур облазының губернатору Олег Кожемяко-биле телефон дамчыштыр чугаа кылгаш, деткимчениң сөстерин чугаалааш, Тыва дуза көргүзеринге беленин бүзүреткен. «Бойдус халаптарының үезинде дуза кажан-даа артык эвес дээрзи биске билдингир. Олег Николаевич-биле эш хуу хамаарылгавыс эки. Херек таварылгада кайы-даа үеде долгаптарын оон диледим» — деп, Шолбан Кара-оол чугаалаан. Ол ышкаш Тываның Баштыңы Ыраккы Чөөн чүк федералдыг округтуң өөредилге черлеринде өөренип турар Тывадан студентилерни онза хыналдага алырын республиканың өөредилге база эртем сайыдынга дааскан.

Амур облазында улуг хемчээлдиг үер болганының түңнелинде чурттакчылыг черлерни, көдээ ажыл-агый черлерин суг алганындан ук областа федералдыг деңнелдиг онза байдалдың чурумун киирген. Ында 30 ажыг чурттакчылыг черлер, 2300 ажыг чуртталга бажыңнары суг адаанче кирген, 200 ажыг социал ужур-дузалыг объектилер когараан, 4000 ажыг кижини көжүрген. Yерден когарааннарга гуманитарлыг дузаның хемчээлин улгаттырып турар. Ыраккы Чөөн чүкче 205 тонна гуманитарлыг чүъктерни чедиргенин сагындырып каалы.