Төлептиглерге – күрүне шаңналдары

Август 14-те, Республика хүнүнүң бүдүүзүнде, Тыва Республиканың Чазааның Бажыңынга күрүне шаңналдарын тыпсырының чаңчыл болган езулалы болуп эрткен.

Тыва Республиканың Баштыңы – Чазааның Даргазы Шолбан Кара-оол сөс алгаш, республиканың төөгүзүнге, эрткен оруктарынга, Тыва биле Россияның чаңгыс демнежилгезиниң база Кызыл хоорайның үндезилеттинип тургустунганының 100 харлаан юбилейлерин төлептиг уткуур дээш бөгүнгү кылдынып турар ажылдарга, келир үеде сорулгаларга кысказы-биле доктаап, улуг байырлалывыс — Республика хүнү-биле чыылганнарга байыр чедиргеш, күш-ажылга бедик көргүзүглерни чедип алганнарга, хоочуннарга күрүне шаңналдарын тывыскан.

Бир-ле дугаарында Россия Федерациязының Президентизиниң 2013 чылдың апрель 22-де №404 Чарлыы-биле «Айыылга таварышканнарны камгалааны дээш» медаль-биле кожавыс Хакас Республикада ажылдап, чурттап чоруур Игорь Юрьевич Кудиновту база Павел Павлович Панковту шаңнаан. Олар 2012 чылдың июнь 27-де Тожуда Азас хөлге өөредилге-методиктиг чыыш эрттирип турган Россияның Саң-хөө яамызының 39-ку ведомство камгалалының 10 ажылдакчыларының хемези хөл ортузунга чайлып, сугга дүжүп эгелээрге, оларның амы-тынын камгалааш, бедик күрүне шаңналынга төлептиг болганнар. Ынчан айыыл-халапка таварышкаш, сугга дүжер часкан Олег Донгак сөс алгаш, өөрүп четтириишкинниң чылыг-чымчак сөстерин чугаалаан.

Тыва Республиканың күрүне шаңналдары-биле аңгы-аңгы мергежилдиң кижилерин, тергииннерниң тергииннерин шаңнаан. Тыва Республиканың «Шылгараңгай күш-ажылы дээш» медаль-биле Улуг-Хем кожууннуң Хоочуннар чөвүлелиниң даргазы Дадар-оол Данзын-оол шаңнаткан. «Тыва Республиканың алдарлыг ажылдакчызы» хүндүлүг атка «Тывасвязьинформ» ААН-ниң харылзаа четкилериниң эргелеп-башкарылга албанының башкарыкчы специализи Владимир Монгуш, «Тува-онлайн» медээлер агентствозунуң кол редактору Дина Оюн, «Тыва Республиканың өөредилгезиниң алдарлыг ажылдакчызы» хүндүлүг атка Сарыг-Септиң С. К. Тока аттыг №2 школазының математика башкызы Алевтина Кожакова, «Тыва Республиканың культуразының алдарлыг ажылдакчызы» хүндүлүг атка Самагалдайның Ч. Кара-Күске аттыг кожууннуң төп уруглар библиотеказының директору Наталья Дугар-оол, «Тыва Республиканың эртеминиң алдарлыг ажылдакчызы» хүндүлүг атка Тываның күрүне университединиң агрономия кафедразының профессору Ольга Назын-оол олар төлептиг болганнар.

Тыва Республиканың Баштыңы – Чазааның Даргазының Хүндүлел бижии-биле 21 кижи шаңнаткан. Тыва Республиканың Баштыңының өөрүп четтирген бижиин 5 кижиге тывыскан.

Тыва Республиканың Баштыңы Ш. Кара-оол бедик күрүне шаңналдарын алганнарга аас-кежикти, кадыкшылды, чаа-чаа күш-ажылчы, чогаадыкчы чедиишкиннерни күзээн.

Адыгжы Саая.
"Шын" солун  № 94 2013 чылдың август 15