Тиилелге шөлүнге чыскаал

Дүүн, август 2-де, найысылалдың төөгүлүг черлериниң бирээзи Тиилелге шөлүнге Россияның агаар-десант шерииниң хүнүнге тураскааткан Ада-чурттуң Улуг дайынынга амы-тынын берген солдаттарның тураскаалынга чечек дээрбээн салыр байырлыг езулал болуп эрткен. Аңаа дайын хөделиишкиннериниң хоочуннары, агаар-десант шерииниң шериглери база өзүп орар аныяк салгалдың төлээлери болгаш аалчылар киришкен.

Тиилелгениң шөлүнде дайынчы темалыг ырлар байыр шинчи киирип, чаңгыландыр дыңналган. Байырлыг парадка агаар-десант шерииниң улуг болгаш аныяк төлээлери, республиканың кадет корпустуң кижизидикчилери, «Аныяк гвардия» партияның аныяк кежигүннери болгаш Каа-Хем кожууннуң уругларның «Отчизна» шериг-патриотчу лагериниң оолдары каас-шиник хептиг чыскаалган.

Байырлыг чыскаалды кадет корпустуң өөреникчилериниң бедикче көдүрген Тываның, Россияның база Агаар-десант шерииниң туктары-биле ажыткан. Десантниктер байырлалынга тураскааткан езулалга чалаткан аалчылар байыр чедириишкиннериниң чылыг сөстерин чугаалаан.

Ада-чурттуң Улуг дайынының киржикчилеринге тураскааткан «Кым-даа уттундурбаан, чүү-даа уттундурбаан» деп тураскаал чанынга болуп эртер байырлыг хемчеглерниң ыдык чаңчылы – кажыыдалдың минутазы. Чыскаалдың киржикчилери дайын хөделиишкиннеринден болгаш Афганистанга, Соңгу Кавказ регионнарынга болгаш өске-даа «изиг точкаларга» албан-хүлээлгезин күүседип тургаш, амы-тынындан чарлып, Төрээн чуртунче ээп чанып келбээн маадырларга кезээ мөңгеде алдар болгаш сактыышкынны илередип, кажыыдал минутазын кылган. Ооң соонда тураскаалга чечек болгаш бүрү дээрбектерин салган.

Россияның агаар-десант шерииниң хүнүнге тураскааткан байырлыг хемчегниң ажыдыышкынының соонда парадтың киржикчилери Арат шөлүнге чедир чыскаал-биле кылаштаан.

Валерия Конгар

"Шын"солун