Тываның суурларында специалистерге албан бажыңнарын тудуп эгелээн
06.11.2020
Тывада көдээ черлерде ажылдап чеде берген специалистерге дээш 34 чаа бажыңны бо чылын дужаары планнаттынган.
Республиканың Баштыңы Шолбан Кара-оолдуң эгелээни “Албан бажыңы” деп төлевилел-биле тудугларны тудар. Республика «Көдээ девискээрлерниң комплекстиг хөгжүлдези» федералдыг программадан 57,2 млн. рубльди мөөңнеп алган.
34 бажыңның 19-зунда тудуг ажылдары амгы үеде доостур четкен деп, Тываның Көдээ ажыл-агый яамызы дыңнаткан. 10 бажыңның девиирлери доозулгалак. 5 объектиде ажылдар саадап турар. Ооң чылдагааны – тудугжуларын солуп, керээлерни катап чарганында. Ол бажыңнарның ханаларын тудуп үндүрген.
“Албан бажыңы” төлевилелдиң ажылдары арай озалдаан-даа болза, 34 бажыңны чогуур хуусаазында доозуптарын яамы дыңнаткан. Бо төлевилел республикада бир дугаар чыл болуп турар сагындыраал. Төлевилелдиң сорулгазы – суурларже бедик мергежилдиг кадрларны хаара тудары. Тывага тускай эртемниг эмчилер, орус болгаш даштыкы дыл башкылары база өске-даа мергежилдиң специалистери негеттинип турар.
Возврат к списку
|