Чаа-Хөл төп кожуун эмнелгезиниң кезер эмчизи Донгак Ким Маадырович чаа албан бажыңын алган

Ким Маадырович Иркутскиниң медицина университедин 2017 чылда дооскаш, Чаа-Хөл суурга ажылдап чедип келгеш, чурттаар чер чок бергедешкен. Ооң өг-бүлези улуг - 4 кижи бар. Ам ол айтырыг шиитпирлеттинген, аныяк эмчи 51,22 дөрбелчин метр шөлдүг бажыңның дүлгүүрүн бо хонуктарда алган. 

Көдээ суурларга ажылдаар дээш келген специалистерни чурттаар чер-биле хандырар сорулгалыг “Албан бажыңы” төлевилел “Көдээ черлерниң комплекстиг хөгжүлдези” күрүне программазының улуг кезээ болуп турарын сагындыраал. Тыва Республикага шупту 34 албан бажыңын көдээде ажылдап келген специалистерге (чагырга даргаларынга, эмчилерге) тудары планнаттынган. Төлевилелде 17 муниципалдыг районнар киржип турар. Ниитизи-биле 1734 дөрбелчин метр чаа ран-сава ажыглалга кирер. Республиканың кожуннарынга 2-2 “албан бажыңнары” туттунар. Чаа-Хөл кожуунда ийиги алыкчы - кожууннуң чагырга даргазы Баз-оол Радж Кызыл-оолович удавас бажыңнаныр.