Республиканың Баштыңы Шолбан Кара-оол чаңгыс чер-чурттугларынга Тыва дыл хүнү-биле байырны чедирген

“Тыва дылдың хүнүн доктаадып тургусканывыстан бээр чүгле беш чыл эрткен. Тываның Улустуң чогаалчызы Александр Александрович Даржай-биле тургусканывыс бо хүн - чоннуң байырлалы болу берген. Чонувус бодунуң төрээн дылының хүнүн хүндүлеп, ооң чугулазын демдеглеп, келир үези дээш улуг сагыш салыышкынны салып эгелээн. Бистер, тывалар, аас-кежиктиг чон-дур бис. Чээрбиги чүс чылда дыка хөй чоннар төрээн дылын, ооң-биле катай аңгы чон болур байдалын чидирип турда, тывалар төрээн дылывысты чидирбээн бис. Харын-даа ону камгалап арттырарынче угланган хөй-хөй ажылдарны кылып чоргузуп турар бис. Ол дээрге, Россияның удуртулгазының биче-буурай чоннарны болгаш оларның дылдарын камгалаарынче угланган күжениишкиннерниң ачызы-дыр».

Тывада ноябрь 1-де “Тыва дылдың хүнүн” демдеглеп эрттирип турар. Республиканың Баштыңы Шолбан Кара-оол 2016 чылдың январь 18-те чарлыы-биле, регионда күрүне дылы, тыва чоннуң культурлуг болгаш сагыш-сеткил өнчү байлаа болур тыва дылды кадагалап, деткип нептередири-биле ындыг шиитпирни үндүрген. Тываның улустуң чогаалчызы Александр Даржай тыва дылга тураскааткан ол хүннү календарьга киирер саналды киирген.