Коронавирус-биле демисежиринге 190 млн.рубльди республикага тускайлап бээрин Тываның Баштыңы дугурушкан

"Бөгүн Леонид Владимирович-биле (РФ-тиң саң-хөө сайыдының оралакчызы Горнин - ИФ) коронавируска удур демиселде бистиң соңгаарладып болбас хемчеглеривиске саң-хөө хандырылгазының чугула айтырыын дугуруштувус. Республикага ол сорулгага 187 млн рубльди шилчидер шиитпир бар, ол акшалар эртен чедип кээр. Ол дузаламчы-биле ковид аараан кижилерге немелде оруннарны салырынче, база херек эмнерни курлавырлаарынче угландырар бис " – деп, Шолбан Кара-оол соцчеткилерде бодунуң арынында октябрь 29-та бижээн. 

Ооң соон дарый, регион эмчилер болгаш башкыларның шалың төлевиринге 195 млн. рубльди алыр. 

Тус чер чагыргаларның октябрь 26-де медээлери-биле алырга, чаа коронавирус пандемиязы эгелээнинден бээр Тывада ниитизи-биле 9 муң ажыг кижи аараан. Амгы үеде Кызылдың эмнелгелеринде берге байдалдыг 99 кижи бар, оларның алдызы ИВЛ, он ийизи НИВЛ аппараттарда коштунган. 

Майның 22-ден октябрь 16-га чедир коронавирустан 113 кижи чок болган. 8396 кижи сегип экирээн.