Тывада 1177 объектиниң 1071-и кышка белениниң паспорттарын алган

Республика Чазаанга одалга сезонунга белеткел ажылдарының чоруп турарын чугаалашкан. ТР-ниң Одалга болгаш энергетика яамызының медээзи-биле алырга, бо хонуктарда 1071 объект кышка белениниң паспортун алган. 106 объектиде белеткел ажылдары уламчылавышаан.

Кышка белеткел ажылдарының кайы хире кылдынганын хынаар хайгаарал органнары Кызылдың ЧЭТ-те, Ак-Довурактың суг хандырылга черинде септелге ажылдарын ноябрь 1-ге, а хөй аалдыг 93 бажыңнарда база 11 муниципалдыг тургузугларда ажылдарны ноябрь 15-ке чедир узаткан. Одалга сезонунга белеткелди үезинде дооспааны, бажыңнарже чылыгны бээринге шаптыктаваан. Чуртталга бажыңнарынче чылыгны сентябрь ортан үезинде-ле берипкен. 

Социал албан черлери кышка 99 хуу белен. Ийиги черде орук комплекизиниң организациялары – 95 хуу. ТЭК-тиң объектилери 93 белен. Графиктен ЧКА организациялары чыдып каап турар, ында ажылдар 92 хуу кылдынган. Республиканың Чазаа Шагаан-Арыг биле Ак-Довурак хоорайларның чуртталга фондузун бодунуң хыналдазында алган. Бо ийи хоорайның шупту бажыңнары октябрьның 8-ке чедир чылыг-биле долу хандырар ужурлуг.