31.08.2020
Татьяна Санчаа, Тываның өөредилге болгаш эртем сайыды:
- Сентябрь 1-де шупту өөреникчилер, студентилер өөренип эгелээр. Бирги классчыларга болгаш өөренип турар шупту кижилерге байырлал хүнү. Чаа өөредилге чылында шупту өөренир. Ажы-төлүвүс аарый бербезин дээш, ада-иелер сагышты салыр ужурлуг. Ырактан өөренир хевирни ажыглаар бис. Школаже чорудар мурнунда, ажы-төлдүң эъдиниң изиин хынап турарын диледим.
425 санныг шупту өөредилге черлери температураны база хынаар. Эш-өөрү, үе-чергези, өске уруг-дарыг аарый бербезин дээш, кичээлдер мурнунда хыналданы кылыры – эң чугула. Бистиң башкыларывыс кичээлдерни эрттирериниң бүгү-ле аргаларын ажыглаар, кичээнгей чокка кым-даа артпас. Уруг бүрүзүнге билигни бээр.
Республикада 16 техникум база колледжтер бар. Ында база-ла бистиң ажы-төлүвүс хаара туттунган. Оларның аразында 9 класс соонда дужаап кирген назы четпээннер хөйү-биле өөренип эгелээн. Чаа өөредилге черинче кирип алганы база-ла байырланчыг хүн. Амдыызында кызыгаарлыг хемчеглерлиг ийиги чадада чоруп турар болгаш, уруглар садтарында амдыызында чүгле дежурный бөлүктер ажылдаар. Садик бүрүзү Роспотребнадзорга дыңнаткан, чөпшээрел документилерни алган соонда, долу күжү-биле ажылдап ажылдап эгелээринге белен.
Бо чылын капитал болгаш агар септелгени хөйү-биле кылдывыс. Техникумнарывыстың материал-техниктиг баазазын элээн чаартып алдывыс, ынчангаш өөредилге организациялары өөредилгени эгелээринге белен, эжиктер ажык деп, ада-иелерге, оолдар, кыстарга дыңнаттывыс.
Ак-Эрик суурда чаа школавыс уругларны хүлээп эгелээрин онзалап айтыйн. Аңаа “Аныяк өг-бүлеге кыштаг” база “Чаа сорук” төлевилелдер киржикчилериниң ажы-төлүн хаара тудар.
База бир чаа чүүл – техникумга IT–технологиялар талазы-биле өөредилге курстары ажыттынган. Техникумнарывыста болгаш колледжтеривисте бюджет олуттарынче кирип алырынче оолдар, кыстарны чалап тур бис. Ажы-төл астыгып чыдып калбас кылдыр, өөредилгеже кижи бүрүзүн хаара тударын өөредилге яамызы хандырар ужурлуг, ынчангаш яамыга келиңер. Школа доозукчулары профессионал өөредилгеже – дээди азы ортумак тускай өөредилге черинге өөренгени турарын чедип алыр ужурлуг бис. Шупту биргиклассчылар парталарга олурар ужурлуг – ол бистиң онза контролювуста.